عصام زكريا لـ"مصر تايمز":"منتقدي فيلم المُلحد ناس جاهلة ومتخلفة عقليًا"
علق الناقد السينمائي الكبير عصام زكريا ومدير مهرجان القاهرة السينمائي الدولي على الأزمة المثارة حول فيلم الملحد وذلك بعد تردد أنباء حول اتجاه لمنع عرض الفيلم في دور العرض السينمائية بمصر.
عصام زكريا يكشف عن رأيه في منع عرض فيلم الملحد
قال عصام زكريا في تصريحات خاصة لـ “مصر تايمز”:أنا مقدرش أقول أي تخمينات أو توقعات لأن كل حاجة وارد إنها تحصل يعني يمكن يكون المنتج بيعمل دعاية للفيلم ويمكن يكون حصل تعليمات شفهية ويمكن يكون الرقابة قالتلهم لا استنوا شوية، أنا معنديش معلومة مؤكدة ومقدرش أبني تخمينات لأن معنديش معلومات".
وأضاف : "الناس اللي بتهاجم الفيلم من غير ما يشوفوه دي ناس تافهة والموضوع كله مبني على توقعات واستنتاجات إن الفيلم اسمه الملحد يبقى ملحد، دي ناس متخلفة عقليا، يعني هو شافوا الفيلم علشان يتكلموا".
وصرح : "دي ناس قاعدة مستنية أي حد من صناع الفيلم يقول أي حاجة علشان يهجموا عليه، وللأسف إذا كان فيه استجابة من المنتج أو الرقابة أو الأجهزة كرد فعل على الناس دي، يبقى في الحقيقة ده يبقى شئ سئ جدا ويستاهلوا اللي يجرالهم، لأن الناس دي متستحقش غير التجاهل".
وأوضح : "دي ناس جاهلة وقاعدة طول الوقت مستنية تعمل أي معارك وهمية لأجندات في دماغها، وعلاج الناس دي التجاهل مش إن أنت تاخد برأيهم وتعملهم حساب في الحياة أصلا، وطول ما أنت عامل حساب للناس دي أنت اللي خسران، وده كل اللي أقدر أقوله".
واختتم : "طول ما أنت بتعمل حساب لشعب السوشيال ميديا المتخلفين واللجان المطلوقة على الناس في السوشيال ميديا، طول ما أنت بتخسر"
