محمد أبو داوود في حوار لـ"مصر تايمز": لم أتخيل نجاح مسلسل مفترق طرق بهذا الشكل.. مستعد أرجع للإخراج المسرحي حال وجود نص يستفزني.. أعمال موسم الرياض تجارية ومحدش يقدر يسحب بساط الفن من مصر
محمد أبو داوود.. يعد فنان قدير ومخرج مسرحي من الطراز الرفيع، شارك في العديد من الأعمال الفنية الهامة بالسينما أو الدراما التليفزيونية، قدم الكثير من الأدوار المتنوعة والمؤثرة، كما له إسهامات عديدة في الإخراج المسرحي وقدم عدة مسرحيات متميزة.
استطاع الفنان محمد أبو داوود، أن يترك بصمة مميزة في أحدث الأعمال التي عُرضت عليه مؤخرا وهو مسلسل مفترق طرق الذي حصد ردود فعل وتفاعل جماهيري كبير عبر وسائل التواصل الاجتماعي.
فتح الفنان الكبير محمد أبو داوود خزينة أسراره وكشف خلال حواره لـ"مصر تايمز"، عن كواليس مسلسل مفترق طرق، وإلة نص الحوار.
في البداية حدثنا عن شخصية نجيب أبو الحسايب التي قدمتها بمسلسل مفترق طرق رغم صغر مساحة الدور على الورق؟
أنا مبفكرش في مساحة الدور قد ما بفكر الدور ممكن يسيب تأثير ولا ميسيبش، والحمد لله إن وجهة نظري كانت صح، والحمد لله إن الدور بقى من الأدوار العواميد الأساسية للمسلسل، والحمد لله عجب الناس وكل الناس اتكلمت عنه، وطبعا المخرج كان له دخل كبير في هذا النجاح.
هل توقعت أن المسلسل سيحقق هذا النجاح الكبير ويحظى بتفاعل الجمهور ؟
الحقيقة بالشكل اللي هو وصل بيه ده لا، وكنت عارف إن المسلسل هيطلع كويس لأنه الكتابة كانت كويسة، والمخرج متميز ومجموعة من الفنانين كبار، كنت متوقع إنه كويس ولكن مكانتش بالدرجة اللي الحمد لله ظهر عليها المسلسل.
كيف حضرت لمشهد صفع عمر المنسي وإظهار ريأكشنات الشماته والغّل في رد فعلك ؟
أنا مذاكر دوري كويس الحمد لله ومذاكر المسلسل والصراع على مدار المسلسل بيني وبين عمر المنسي، والصراع كان واضح لدى الناس، إذا لابد أن يكون الريأكشن المناسب في الوقت المناسب.
هل هناك اتجاه لتقديم جزء ثاني من المسلسل؟
والله معرفش لأن محدش لسه كلمني في حاجة حتى الآن.
بما أنك مخرج مسرحي ما انطباعاتك عن فعاليات الدورة الـ 17 لمهرجان القومي للمسرح ؟
مقدرش أقول انطباعات لأن الانطباعات بانت في الختام وأنا بقول التوصيات والملاحظات كرئيس لجنة التحكيم والنتائج اللي طلعت أنا واللجنة والحمد لله أنا مقدرش أقول انطباع، الناس هي اللي تقول ويعني ما شاهدوه والنتائج، وأنا الحمد لله سواء في كلمتي في إلقاء التوصيات والملاحظات وتسليمي لشهادات لجنة التحكيم الخاصة، الحمد لله الاستقبال كان رائع ومتميز الحمد لله.
ما الذي يحمسك للعودة للإخراج المسرحي من جديد ؟
ألاقي نص يستفزني وأقدر أقدم فيه شئ أفضل من اللي قدمته قبل كدة، لأن جميع أعمالي الحمد لله كانت متميزة، فمعنديش استعداد إني أرجع بحاجة نص نص أو مقبولة، وعندي الشجاعة أرجع للإخراج مرة أخرى بعد انقطاع آخر عمل عملته في 2010، يعني أنا بقالي 14 سنة، فعلشان تجيلي الشجاعة وألاقي اللي يحمسني دي مسألة بيتهيألي صعبة شوية.
ما تعليقك على اتجاه عدد كبير من النجوم لتقديم مسرحيات بالخارج بالأخص في المملكة العربية السعودية؟
دي مسألة تانية، وأنا قبل كدة قدمت في السعودية أنا وهاني رمزي عرض هناك اسمه أبو العربي، بس هو كان معروض في مصر يعني مش معمول خصيصا لموسم الرياض، وعرضناه في جدة والرياض، وكان عملا متماسكا لأنه كان معروض في مصر واتعرض مدة طويلة، إنما العروض اللي بتتعمل هناك دي مسألة تانية يعني مسألة ممكن تبقى داخلة في شكل تجاري أكتر، لأنها بتبقى مرحلة يعني وممكن يبقى فيه بعض عروض تتكلف كتير واتصرف عليها كتير واللي عملوها كانوا عاملينها لفترة محدودة لأنهم ميقدروش يستمروا في المسرح كتير لأن المسرح له رجاله يعني.
ما تعليقك على الأقاويل التي تتردد بأن السعودية سحبت بساط المسرح من مصر؟
محدش يقدر يسحب بساط الفن من مصر لأن مصر دولة قديمة وعريقة في الفنون كلها مش في المسرح بس، يعني المسرح أبو الفنون ومصر من الرواد الكبار اللي محدش يقدر لأن جذورها من سنوات طويلة، إنما كل الناس عليها أن تجتهد وأنها تحاول إنها تعمل فن لبلدها ده شئ جميل وحلو بس حتى دلوقتي اللي بيتعمل هناك بيتعمل بمصريين متعملش بغير المصريين، كإن المصري اتنقل من هنا لهنا إنما هتسحب مني البساط في إيه، أنت عامل بيا يعني.
قدمت عدد كبير من الشخصيات هل هناك شخصية ترغب في تجسيدها ولم تقدمها من قبل ؟
طول ما ربنا مديلي صحة ونفس لسه عندي حاجات كتير معملتهاش، رغم إن أنا عملت كتير اوي إنما لسه بدور وببحث وأي دور بيجيلي سواء كبير أو صغير بحاول أعمل فيه شئ يبقى قدمت حاجة كمان زيادة يعني، ف ربنا سبحانه وتعالى يارب يكرمني بالشئ اللي أقدر أعمله كويس يعني.
ما العمل الذي قدمته وتعتز به ويعتبر أفضل عمل في تاريخك الفني؟
مقدرش أقول عمل واحد، إنما عملت أعمال كتير اه فيه حاجات بيبقى عندي فيها تميز عن حاجات، وفيه حاجات ربنا وفقني فيها أكتر، وفيه حاجات مخرجين ساعدوني فيها أكتر من حاجات، فمقدرش أقول عمل لأن أنا حتى في الأوقات اللي ببقى مبشتغلش وقاعد أتفرج على التليفزيون وأقلب في القنوات، والحمد لله كل ما أقلب قناة ألاقي فيها هنا فيلم وهنا مسلسل، وحاجات منها أكتشف إنها أقول الله ما أنا كنت كويس أهو يعني، فمقدرش أقول عمل واحد الحقيقة لأن زي ما بنقول كلهم أولادي، فيه حاجات كتير الحمد لله متميزة عملتها.
