عماد يسري لـ "مصر تايمز": ولاد رزق كان متوقع له إيرادات غير مسبوقة
علق الناقد السينمائي عماد يسري على الإيرادات الغير مسبوقة التي حققها فيلم "ولاد رزق 3" وذلك بعد أن تخطى الربع مليار جنيه خلال شهرين من طرحه في دور العرض السينمائية بمصر .
تعليق عماد يسري على الإيرادات الضخمة لولاد رزق
وقال عماد يسري في تصريحات خاصة لـ "مصر تايمز" : "طبعا فيلم ولاد رزق كان متوقع ليه إنه يحقق إيرادات غير مسبوقة في السنوات الأخيرة، وده نظرا للإقبال الجماهيري اللي تم رصده في العيد كان إقبال جماهيري كبير، وده متحققش لفيلم مصري من قبل سنة 2010، الإقبال بالشكل ده على دور العرض السينمائي لغاية حفلات الصباح دي محصلتش من قبل 2011" .
وأضاف : "ف طبعا إن الفيلم يحقق نجاح بالشكل ده كان متوقع، ليه الفيلم حقق نجاح بالشكل ده لأن فيه عوامل للنجاح أدت لكدة، عوامل النجاح أولها التسويق بشكل مختلف ومبتكر للفيلم ده أدى لإقبال الجماهير، زائد أن لأول مرة من سنوات من أكتر من 15 سنة نلاقي فيلم أكشن مصري مختلف بمواصفات عالمية، ولأننا للأسف السينما المصرية فاشلة وأعي هذه الكلمة فاشلة في صناعة الأكشن، والدليل عدم إقبال الجمهور الخليجي والشباب المصري على أفلام الأكشن المصري وكان دايما بيشتكوا إن دي أفلام فاشلة، وأنا بجيب الكلمة اللي كان بيتم ترديدها داخل مصر بين الشباب مكانوش راضيين على الأكشن المصري، وكمان كان دول الخليج بترفض توزيع فيلم أكشن مصري أو ميبقاش مهم بالنسبة لها، لأن للأسف افتقدنا القامات اللي كانت بتقدملنا الأكشن المصري بعد وفاتهم" .
وأوضح : "العوامل الكتير مع وجود نجوم ليهم جماهيرية مع قصة هي مش قصة جديدة ولكنه تيمة تم تقديمها قبل ذلك ف كانت تيمة ناجحة وهي التيمة الشعبية اللي هي دايما بتكون عامل جذب بالنسبة للجمهور لدرجة أن الفيلم كان مصنف ولكن كنت بلاقي إن العائلات بتخش الفيلم، وده شئ رصدته أنا بنفسي، وده دليل على حب الجمهور للفيلم، إذا عوامل كتير يعني اتجمعت حتى كمان ضيف الشرف كريم عبد العزيز أضاف للفيلم، الفيلم كله كان فيه مجموعة من عوامل للنجاح وكان فيلم تجاري ولايت وأكشن، فيلم عيد اللي هو الجمهور بيفضلها طول عمره في أفلام العيد "
