ماجدة خير الله لـ "مصر تايمز": "أغنية محمد رمضان بايخة ومش مختلفة عن اللي قدمه قبل كده"
علقت الناقدة السينمائية الكبيرة ماجدة خير الله على الأزمة الأخيرة لمحمد رمضان حول أغنيته الأخيرة "مش فاضي" وذلك بعد أن قام المحامي أيمن محفوظ بإنذار الدكتور أشرف زكي نقيب المهن التمثيلية بشطب محمد رمضان من النقابة.
تعليق ماجدة خير الله على شطب محمد رمضان من النقابة
وقالت ماجدة خير الله في تصريحات خاصة لـ "مصر تايمز": "مش من حق أي شخص من برة يجي يقول لحد وقف أو الغي عضوية فلان كلام فاضي يعني، ثم إن الأغنية هي أغنية سخيفة زي عشرات من الأغاني اللي مش لطيفة، ولكن متقوليش إن فيه أبعاد وفيه ألفاظ، أنا سمعتها مجرد أغنية سخيفة وخلاص من الحاجات اللي بنسمعها ليل ونهار".
وأضافت: "فهو فيه حالة غل على محمد رمضان يعني أنت كنت بتبلعله كل نفس الأشياء دي من سنة، هو طول عمره بيعمل كدة مكانش بيغني أغاني قصايد مثلا، هو طول عمره بيغني نفس الأغاني وبيعمل حفلات على نفس الطريقة، ومحدش متوقع منه في مجال الغنا أفضل من كدة يعني، وهو مش بيدعي إنه هو مثلا مطرب، هو واحد بيقدم سوء والناس للأسف بتروح، ف هتقعد تقول أصل فيه أبعاد أنا سمعت الأغنية مفهمتش إيه الحكاية إلا إذا خيال الناس فيه أشياء مش لطيفة، فبيسقطوها على الأغنية ده موضوع تاني خالص".
وصرحت: "وممكن يكون الناس مش عاجبها موقف محمد رمضان لما ظهر في الإعلان، واستفزوا منه، ولو إن مشوفناش الاستفزاز ده من ناس تانية عملوا نفس الموقف يعني، والأغنية بايخة بايخة زي عشرات الأغاني اللي الناس بتطلقها، وبيغنوا عليها ويرقصوا عليها في الأفراح، مجرد أغنية بايخة يعني أنا مش شايفة إنها مختلفة عن اللي بيتقدم يعني ولا مختلفة عن اللي محمد رمضان قدمه قبل كدة، مش معنى كدة إن احنا نستمتع بيه بس أهو بيتقدم" .
وأوضحت: "امنع الأغاني دي يعني إذا قدرت تمنع، هو مش فيه رقابة على الأغاني دي ولا مفيش، بدل ما تسيب واحد يغني أغاني مش عاجباك وبعدين تقول اشطبه من النقابة ده حاجة وده حاجة، لما تغني أغاني بايخة متشطبوش من نقابة الممثلين لأن نقابة الممثلين حاجة تانية، اللي عامل القضية مش فاهم، ومفيش حاجة اسمها بيسيئ للممثلين يعني هو مال أمه، يعني المحامي ده مال أمه إذا كان بيسيئ يعني هل زمايله الممثلين اشتكوا، ده واحد بيغني أغنية بعض الناس شايفة إنها مش مناسبة، مينفعش تقول الغيه من نقابة الممثلين لأن ده حاجة وده حاجة، لازم تبقى فاهم أنت بتعمل إيه أو بتعترض على إيه" .
وتابعت: "هل مثلا محمد رمضان عامل أغنية وحشة نقول اسحب رخصة القيادة بتاعته أو اسحب جنسيته المصرية أو اسحب رصيده من البنك، أنت دلوقتي معترض على أغنية اتكلم في حدود الأغنية، لأن إذا كان الأغنية سيئة قول ليه سمحت الرقابة بعملها، أو يتساءل ليه نقابة الموسيقيين سمحت بيها، ف مصطفى كامل هو اللي يرد أو هو اللي يتصرف أو يقول مش هندي تصريح غناء لمحمد رمضان تاني، لكن خلط الأوراق وعدم فهم أنت بتعترض على إيه ده موضوع تاني، اللي بيعمل القضية ده مش فاهم بيعمل قضية على إيه يعني ده راجل عايز شوشرة وعايز يعمل موقف وخلاص، مفيش مانع إن حد يعترض بس لما تعترض اعترض على حاجة تبقى فاهم أنت بتعترض على إيه" .
أكملت: "لو هو عمل حاجة غير مناسبة في الموسيقى، مينفعش تروح لبتاع التمثيل إلا لو أنت أحول أو مش فاهم أو عندك غباوة، إيه دخل نقابة الممثلين بموضوع تاني خالص، وبعدين الأغنية مش اسوأ من أغاني كتير بتتردد طول الوقت، أنا لما سمعتها مفهمتش إيه الحتة اللي مش عاجبة الناس" .
وأضافت: "فمعنى كدة إن خيال الناس هو اللي فيه أشياء سيئة لأن الأغنية لا تحمل لفظ، لأن الرقابة عمرها ما كانت هتسمح بيها، ف أنا مفهمتش المقصود إيه من الجملة بس اللي بيكمل الصورة ده من خياله فمتقدرش تعاقب واحد على خيالك، أنت اللي بتكمل الأغنية وأنت اللي حاطط الكلمة مش هو، هو منطقش، الأغنية على بعضها سخيفة، لكن أنت متربص بفلان رغم إنه طول عمره بيقدم هذا اللون، يعني مكانش بيقدم حاجات عميقة أو حاجات فيها قيمة، وبعد كدة خرج من القاعدة هو طول عمره بينجح بالأغاني دي" .
واختتمت: "وإذا كان ليك موقف من بعد تصرفاته ومواقفه السياسية ده موضوع تاني متخلطش حاجة بحاجة ده اللي أنا أفهمه، وبعدين ليه الناس مش واضحة، خلينا نغضب على أشياء منطقية مش على أشياء هبلة علشان الناس تحترمنا، لما تبقى ضد واحد علشان له موقف من حاجة الناس أجمعت إنها تعمل عليها مقاطعة في وقت ما، متجيش أنت تبوز الدنيا وتعمل إعلان لهذه الشركة اللي عليها علامات استفهام، لأن أنت بتعمل إعلانات على حاجات كتير ومحدش بيقولك حاجة، فأنت تغضب على الحاجة التي تستدعي الغضب ويبقى كلامك واضح متقولش كلام في الهجص يعني"
