"مصمم على هدم القيم الاجتماعية".. المحامي أيمن محفوظ يكشف أسباب تقديم انذار لشطب محمد رمضان - خاص

كشف المحامي أيمن محفوظ عن دوافعه لتقديم إنذار للفنان أشرف زكي مطالبا بشطب الفنان محمد رمضان من نقابة المهن التمثيلية وذلك بعد طرحه مؤخرا لأغنية "مش فاضي" .

أيمن محفوظ يكشف عن تفاصيل مطالبته بشطب محمد رمضان من نقابة الممثلين 

قال أيمن محفوظ في تصريحات خاصة لـ "مصر تايمز" : "محمد رمضان مصمم على هدم القيم الاجتماعية ونشر البلطجة والأغنية فيه توعد وإحنا قولنا إنه شيخ المتوعدين وخلى كل الناس وراه تقلده سواء في البلطجة الفنية أو البلطجة الواقعية بنشوف كل الشباب في الشارع قالعين وماسكين سلاح، أما بالنسبة للأغنية دي بتهدم القيم الاجتماعية وبتمثل جريمة طبعا تخالف الكرامة والسلوك القويم لعضو النقابة باعتباره عضو في نقابة الممثلين، ده خلانا ندفع بإنذار لأن القانون يسمحلنا بده، والأستاذ أشرف زكي ربنا يكرمه طبعا عنده تصريحين مشوفتش ومعرفش بالبلدي كدة مش أنا أختي منى، في كل حالة مع الأستاذ محمد رمضان". 

وأضاف: "وبعدين يقولك إحنا نفتح تحقيق وبعد كدة يقول إحنا بنحقق ومفيش أي نتائج لكن لما بنقدم نفس الإنذار أو نفس الشكوى لنقابة الموسيقيين ربنا يديله الصحة هاني شاكر النقيب السابق بيتصرف، والأستاذ مصطفى كامل بيتصرف، إنما أشرف زكي مشوفتش ومعرفش واحنا بنحقق ومفيش أي نتائج كإن محمد رمضان عنده حصانة وده يشجعه إنه يغلط مرة واتنين وتلاتة وعشرة غير إنه هو مسنود ف أنا عايز أفهم هو مسنود من مين، يعني أنا طول النهار ببهدل فيه والجمهور يبهدل فيه، وهو ولا هو هنا، لأن دماغه مش في المصريين دماغه في ولاد العم بيتصور معاهم ويدعموه ويعملهم إعلانات وكدة يعني، اللي دفعني القانون، فيه مواد في القانون يعني الإنذار هتلاقي بنوده إن أنا مش بتكلم إن أنا عندي دوافع، بل علشان خايف على ولادي وولاد الدنيا كلها، كل واحد هيقول لواحد أنا رجولة وأنت تيت، ف العيل هيقول للعيل ممكن توصل لجريمة، راجل يقول لراجل ممكن توصل لجريمة، ست تقول لراجل، المجتمع يبقى في فوضى ولكن هو ولا يهمه المجتمع ولا يهمه الناس ولا يهمه الدنيا" . 

وصرح : "محمد رمضان زي فتيات الدعارة بالظبط اللي بيعري جسمه كراجل زي الست اللي بتعري جسمها بالظبط، وربنا يعينه الدكتور أشرف زكي اللي أول ما بعت الإنذار للصحفيين اتصلوا بيا قولتلهم هيقولكم مش أنا أختي منى، مشوفتش ومعرفش، مع إن أنا باعتله الإنذار قبل ما أبعته رسميا والراجل بيرد عليا بس هنا الراجل لا حول له ولا قوة لأنه ممثل وده يعني نجم وكدة، حتى أنا كنت مع ناقد فني في قناة أوربت من يومين كدة بقوله ترضى إنك تبقى تيت، ترضى إن ابنك يقولك تيت، قالي اه أرضى، كلها شغلة مصالح ولا خايفين على البلد ولا بيفكروا في البلد ولا بيفكروا في الشباب، وشوف مطربي المهرجانات كلهم هتلاقي الليثي والبحراوي وأحمد سعد كلها أغاني توعد، ودي بتعمل مشاكل آخرهم أخو كهربا ورضا البحراوي، ف ده فاجر وداعر" . 

وأوضح : "كان ليه فيديو كان بيقول للناس أنتوا مبتحاربوش ليه، قدمت فيه بلاغ إنه بيتعدى على اختصاصات رئيس الجمهورية، يعني اللي هو أنا هاخد قرار الحرب، تخيل لما يكون رئيسك واحد عرة و حقير زي ده وعايز أقول إنه قبل كدة سلط الكلب المحامي بتاعه في تصريحات تليفزيونية بيقولي يا اللي من الزاوية مع إن المحامي العرة ده من الشرابية، والكلب اللي مسلطه من حواري المنيب، وأنا بقالي سنين بقدم فيه شكاوي مفيش غير نقابة الموسيقيين هي بس اللي بتتحرك مع الكلب ده، وبعدين ده فاجر وبفلوسه يشتري أي كلب، وهو محمد رمضان بيدي حد حاجة ده بيشغل كل الناس عنده ببلاش بما فيهم إخواته، ف هو شخصية مجنونة على شخصية هستيرية على شخصية نرجسية على شخصية ولا هاممها الشباب ولا هاممها الدنيا، الناس قبل محمد رمضان كانوا عاملين إزاي" . 

واستكمل : "وفيه ناس من اللي بيجاملوا محمد رمضان بيقولوا إني بعمل كدة علشان الشهرة واللايكات، أنا مش محتاج شهرة الحمد لله أنا على كل قنوات العالم، كل قنوات العالم بتسضيفني أكتر من القنوات المصرية، وبعدين هو الناس بتعمل لايكات على الحاجات اللي رافضاها، وهو أشرف زكي يقدر يقول إن اللي أنا قولته ده كلام فارغ، ده لو قال كدة يبقى نهاره أسود، وأنا بعمل إنذار بما يرضي الله وبنصوص القانون وأنا قايل لأشرف زكي في مواجهة وش لوش في إحدى القنوات اقرأ قانون المهن التمثيلية، هما بالظبط يصحوا الصبح عايزين مصلحة من نمبر صفر وهو ولا بيدي حد حاجة ولا بيعبر حد" . 

وردا على تصريحات طارق الشناوي وماجدة خير الله بعدم شطب محمد رمضان من النقابة بالرغم من ردائة الأغنية قائلا : "أولا النقاد دول بيدوروا على عضمة يرميهالهم سيدهم محمد رمضان اللي مبيرميش لحد عضمة، الناس دي بتقول إن ده عمل فني ردئ يعني هما اعترفوا إن أنا على حق إن أنا بهاجم عمل فني ردئ،  قالوا إن ده ميناسبش عقوبة الشطب، وفيه مادة بتقول إنها تستحق العقوبة من الإنذار لحد الشطب، وطالما هما جهلا بيتكلموا في القانون ليه، ليه بيتكلموا في حاجة ميفهموش فيها، وشوف طارق الشناوي بيطلع في التليفزيون قد إيه وتصريحاته اللي بتطلب منه مش اللي بيفرضها قد إيه، وشوف أنا بطلع في التليفزيون قد إيه، طارق الشناوي بيطلع في التليفزيون 4 مرات في السنة، أنا بطلع 4 مرات في اليوم، شهرة إيه اللي بيقول عليها، وبعدين أنا مهزقهم قبل كدة وقايلهم أنتوا بتلحسوا الأقدام، طارق الشناوي ده بيروح القنوات العربية اللي بتديني فلوس علشان أطلع معاهم بيروح يبلطج عليهم علشان ياخد منهم فلوس، وهو كدة أي واحد عاطل أو صايع معندوش شغلانة يقول أنا ناقد فني، وطارق الشناوي دايما بيكون حاجة من الاتنين يإما بيطبل رسمي علشان مصلحة يإما بيهاجم حد علشان يبتزه هو ده طارق الشناوي" . 

وأشار : "وإيه الشهرة إن أنا أدفع من جيبي وأوجع دماغي وأصدع نفسي، وأطلع في التليفزيون، أنا بوعي الناس وكفاية الناس يعني حتى لو معملش حاجة أشرف زكي بيحاسبوني أنا، يعني وأنا مالي هو أنا أشرف زكي، طب أشرف زكي مطبلاتي وهو بيطبل لمحمد رمضان وبينافقه، بس أنا مش صاحب قرار، يعني الناس دي ربنا يهديهم وده هيقعدلهم في عيالهم إن شاء الله لأن دول أبالسة وشياطين ومجرمين" . 

وردا على تصريحات ماجدة خير الله بأولوية توجيه الإنذار لنقابة الموسيقيين بحجة أن الاعتراض على أغنية قائلا : "ده منتهى الجهل يعني أبوه الشرعي هو نقابة الممثلين، يعني ده جهل وتخلف يعني لما أروح أشتكي الواد أشتكي لأبوه ولا خاله، وهو منتمي لنقابة الموسيقيين لأنه منتمي لنقابة الممثلين، يعني أروح لأبوه ولا لخاله، احنا روحنا لخاله قبل كدة وهزقه، بس أنا عارف إن نقابة الموسيقيين فيها مشاكل دلوقتي ومش فاضية تصارع على محمد رمضان، ولكن أنا روحت لأبوه المسئول عنه أشرف زكي الممثل، أهو ده جهل وتخلف".