كفاية تطبيل.. رضا عبدالعال يهاجم هولاء قبل مباراة السوبر الأفريقي (خاص)
هاجم الإعلامي رضا عبدالعال، العديد من الأشخاص، قبل مباراة السوبر الأفريقي 2024 بين الأهلي والزمالك في القمة المصرية المرتقبة.
كفاية تطبيل.. رضا عبدالعال يهاجم هولاء قبل مباراة السوبر الأفريقي (خاص)
قال رضا عبد العال في تصريحات خاصة لـ «مصري تايمز»: «مفيش عدل ولا فرص متوازنة، كله واقف وبيساند الأهلي والزمالك فريق ضايع، واحد معاه الدعم كله والتاني كان الله في عون جماهيره».
وأضاف: «لاعيبة الزمالك محطمة معنويًا بسبب الانسحاب الأخير، والجماهير بيتحرق دمها، والأهلي عمل صفقات قوية، وكولر أجمد من جوميز، ومش فاهم إيه قصة الحكام دي بصراحة، الموضوع بقى فيه شك ومريب».
وتابع: «نفسي الماتش يبقى نضيف، ونشوف كرة حلوة، ونبارك للفائز، ومتبقاش بطولة السوبر الأفريقي موجهة لنادي معين، وياريت نجيب أقوى حكم في أفريقيا، ونشوف في الملعب مين هيكون أحسن، والمفروض الزمالك على الأقل يطمن إنه مش هيخسر من الأهلي قبل الماتش».
وواصل رضا عبدالعال: «كولر وجوميز ضحكوا على الجماهير المصرية، وهما على الله حكايتهم أصلًا، الأهلي والزمالك هيروحوا السعودية يعملوا عمرة ويرجعوا تاني وشكرًا على كدة».
وأردف: «كولر خد الدوري بالحكام وعلى طول بنأجل عشان نداري عليه، ويرجع من تاني للمنافسة، كله اتكلم على 6 بتاعت ميكالي أمام المغرب، محدش قال حاجة يعني لما كولر بلع 5 من صن داونز».
وأكمل: «الأهلي والزمالك أوحش من بعض، بس في دعم 95% ليهم، أنا بقيت في بيتي بتفرج على ماتشين الفريقين بدون معلق عشان التطبيل كتر أوي بصراحة، طب طبل لو الماتش يستاهل، ده حتى في معلقين بتخاف تجامل الزمالك وتتكلم عشان ميطردوش زي بلال علام وحاتم بطيشة».
وزاد: «بس التطبيل حلال للأهلي طبعًا، كفاية بقى يا جدعان ونبي، طب أعملوا كده لما يبقى الماتش يستاهل، مبقاش في كورة في مصر خلاص، وطول ما العدل والضمير بُعاد مش هيبقى في كرة قدم ولا منتخب مصر ولا محترفين حتى».
اقرأ أيضًا: موعد مباراة الأهلي والعين الإماراتي في كأس إنتركونتيننتال 2024
وأوضح رضا عبدالعال: «محمد عبدالمنعم لازم يخلع عباءة النادي الأهلي، لأنه بيتعامل مع دوري وإعلام وحكام مختلفين تمامًا عن إللي هنا، ومفيش صفحات هناك في فرنسا، ولا مواقع علشان تدي فلوس وتطبلك للصبح زي هنا».
وبين: «محمد عبدالمنعم كان متعود في مصر إن أي لمسة له بفاول، ولكن الدنيا هناك في فرنسا مختلفة تمامًا، وعلشان كده يا عيني لايص، كله عايز الأهلي يكسب على طول وأكبر دليل إللي حصل في ماتش البنك، نلغي الدوري أحسن».
واختتم رضا عبدالعال: «دول بيهربوا من المنتخب زي محمد عبد المنعم كدة، ومفيش ضمير خالص، الأهلي هيكسب السوبر الأفريقي عشان عنده تدعيمات قوية مش زي الزمالك فاضي».
موعد مباراة الأهلي والزمالك في السوبر الأفريقي 2024
موعد مباراة الأهلي والزمالك في السوبر الأفريقي 2024 سيكون يوم الجمعة، والموافق 27 سبتمبر 2024، وبالأخص في تمام الساعة التاسعة مساءً بتوقيت القاهرة ومكة المكرمة.
ويحتضن ملعب «المملكة أرينا» بمدينة الرياض في السعودية، مباراة الأهلي والزمالك في السوبر الأفريقي 2024.
