يسري نصر الله لـ"مصر تايمز": "المفروض السينما تقدر تعمل أفلام عن فلسطين"
كشف المخرج الكبير يسري نصر الله عن دور السينما المصرية في تقديم أفلام تسلط الضوء على الصراع العربي الإسرائيلي في ظل الأحداث التي تشهدها المنطقة خلال العام بداية من فلسطين ومؤخرا في لبنان.
رأي يسري نصر الله في تقديم أفلام عن الصراع العربي الإسرائيلي
وقال يسري نصر الله في تصريحات خاصة لـ "مصر تايمز": "المفروض السينما تقدر تعمل كدة ولكن مش بمناسبة اللي بيحصل يعني، موضوع فلسطين موجود من سنة 1948، ف أنا ضد المناسبات، أنت بتعمل الأفلام لأنك حاسس بيها لأنك عايز تعمل ده، إنما مش بتعملها بإنك بتدوس على زرار كرد فعل لحاجة بتحصل دلوقتي".
وأضاف: "دي حاجة من سنة 1948 قاعدة بتحصل وعنيفة من سنة 48 لحد دلوقتي، اللي بيحصل دلوقتي مينفعش تقول بمناسبة اللي بيحصل دلوقتي لازم نعمل، وأنا عملت فيلم باب الشمس وده مكانش بمناسبة أي حاجة كان بمناسبة إن أنا عايز أعمل ده" .
وأوضح: "أنا فوجئت لما اتعرض الفيلم أول مرة في الجونة فيه ناس جت قالت إزاي تنبئت باللي بيحصل دلوقتي، يعني إيه تنبئت، أنا ذهلت يعني هل يعقل فيه ناس مش عارفة إن ده بيحصل من سنة 48 لحد دلوقتي، والهجوم على لبنان من سنة 82 يعني دي حضرناها وشوفناها صبرا وشاتيلا والحاجات دي كلها، مش ده كان هما موجودين في لبنان محتلينه، وهل أنت بتتفاجئ إنك أنت النهاردة بتكتشف مرة واحدة إن إسرائيل دي دولة عدوانية جدا، ياريت بس نعمل أفلام مش موضوع إنك تعمل أفلام عن فلسطين، تعمل أفلام كويسة تقول احنا موجودين بحق وحقيقي، يمكن الناس تسمعك وتتعامل معاك إن إحنا بني آدمين مش فلكلور".
وكشف عن إمكانيته تقديم عمل فني مرة أخرى عن القضية الفلسطينية والصراع العربي الإسرائيلي بعد فيلم باب الشمس قائلا: "لا ولكن اوي اوي أقدم حدوتة عن ناس فلسطينيين أنا بحبهم، إنما قضية ومش قضية أنا مش بتاع قضايا، أنا مش محامي".
الأحداث الأخيرة بلبنان
جديربالذكر؛ تدين جمهورية مصر العربية التصعيد الإسرائيلي الخطير في لبنان والعمليات العسكرية الموسعة التي أدت إلى مقتل وإصابة المئات من اللبنانيين، من بينهم نساء وأطفال.
وتعرب مصر عن خالص تضامنها مع لبنان وشعبه الشقيق، وعن خالص تعازيها لأسر الضحايا وتمنياتها بالشفاء العاجل للمصابين، وتؤكد رفضها التام لأية انتهاكات لسيادة لبنان وأراضيه.
