السيسي: بنستورد عطور ومزيلات عرق بـ 440 مليون دولار.. وتقولوا الدولار غلي ليه؟
دعا الرئيس عبد الفتاح السيسي المستثمرين ورجال الصناعة، إلى البدء في إنتاج المنتجات التي يتم استيرادها من الخارج، معلقا: "يا أهل الصناعة يا مستثمرين يا رجال الأعمال يا اللي شغالين في البنوك والاستثمار اللى قدام منكم عبارة عن فرص عمل ليكم لأن كل منتج من ده دفعناه بالدولار علشان نجيبه لمصر.
وتساءل الرئيس: 9 مليارات دولار تليفون محمول ومنتجات أدوية بعضها يمكن ماتقدرش تعمله لكن يا ترى كل الأدوية ماتقدرش تعملها؟..عندنا أهم حاجة الناس بتستسهل بدل ما يجيب الكلام ده ويعمله في مصر ويخش في متاهات مع أرض وتمويل ونقل تكنولوجيا من بره علشان ينتج اللى بنقول عليه ده، يقول اشتريه أسهل والدولة محاولتش تشتغل بجدية وصلابة وصرامة لما تيجي على بند 16 في الجدول عطور ومزيلات عرق وورق توالي 440 مليون دولار.. شيكولاته 400 مليون دولار..235 مليون سيراميك وبتلومني وتقولوا الدولار غلي ليه؟.
تابع الرئيس: منقولش نقفل البلد يعني.. ورق الفويل 500 مليون دولار مابنعملوش؟ ..الجبنة 1.2 مليار دولار.. نقول للناس مش عارفين نعمل مصانع ننتج الحاجات اللى الناس عاوزاها.. الحلول معانا إحنا كمصريين كرجال أعمال.. اللى مكتوب عبارة عن فرص عمل لإنتاج المنتجات دي لمصر وتبيعه وناس بتشتغل وناتج محلي وشوية ضرايب للدولة.. السيارات 25 مليار دولار معقول مش قادرين نخلي شركات السيارات تنتج سيارات في مصر نستور بس نسبة.. إذا كنتم عاوزين تتجاوزا تحدي الدولار لازم نسبة كبيرة من هذه المنتجات يتم تصنيعها في مصر وده امر مش سهل ومدعمين الحكومة حتى تخرج هذه المنتجات في اقرب فرصة.. بقا إحنا بنجيب عطور ومش قادرين نعمل في مصر حاجات زي كده؟.
وقال الرئيس عبدالفتاح السيسي، إن الله تعالي هو الذى سيفصل بين الناس يوم القيامة، مضيفا: "مش شرط كل حاجة الناس تبقا فاهماها وقتها .. والقرار بيتاخد ليه؟.. لكن ساعات الزمن بيرد.. وقبل ده فيه رب عظيم علام حكيم هو اللي هيفصل بين الناس".
وفي وقت سابق ، أكد الرئيس عبد الفتاح السيسي، خلال كلمته في فعاليات افتتاح محطة قطارات صعيد مصر ببشتيل في محافظة الجيزة أن هناك ثوابت للحكومة في العمل على كافة الأصعدة.
وقال الرئيس السيسي، إننا سعينا لبناء مستقبل للأجيال القادمة وتوفير الأساسيات التي لا يمكن الاستغناء عنها"، موضحًا 106 مليون وهو عدد سكان مصر كانوا يعيشون على شريحة صعبة وخدماتها الأساسية صعبة وتلك كلمة مهذبة.
وتوجه الرئيس السيسي، بتحية إلى أهالي سيناء، مضيفًا: “اللي بنعمله عشانكم أنتم، عشان بلدكم، تخلوا بالكم منها وتحافظوا عليها، مش على الخط بس، على كل ذرة رمل في سيناء، أمانة في رقبتنا ورقبتكم”
يشهد الرئيس عبد الفتاح السيسي، رئيس الجمهورية، اليوم السبت، افتتاح محطة قطارات صعيد مصر، والكائنة في منطقة بشتيل بمحافظة الجيزة، وذلك بعد الانتهاء من أعمالها الإنشائية.
السيسي يفتتح محطة بشتيل
ومن المقرر أن يحضر فعاليات افتتاح محطة قطارات صعيد مصر ببشتيل، الدكتور مصطفى مدبولي رئيس مجلس الوزراء، ولفيف من الوزراء والمسؤولين في هيئات الدولة من مجلسي النواب والشيوخ، على أن يكون في استقبالهم الفريق مهندس كامل الوزير نائب رئيس الوزراء للتنمية الصناعية وزير الصناعة والنقل، والمهندس محمد عامر رئيس الهيئة القومية لسكك حديد مصر.
تفاصيل محطة قطارات صعيد مصر
وتقع محطة قطارات صعيد مصر أو ما يطلق عليها محطة قطارات بشتيل الجديدة، بمنطقة بشتيل في محافظة الجيزة، إذ تم اختيار مكان المحطة لتكون قريبة من مختلف خطوط شبكة النقل في مصر، سواء المحاور والكباري أو الأتوبيس الترددي أو مترو الأنفاق وربطها بشبكة القطارات الكهربائية ووسائل النقل الأخرى.
وتضم محطة قطارات الصعيد عددا كبيرا من الخدمات من بينها المول التجاري والجراجات، ومساحة هذه المحطة 57 فدانا، أي تبلغ 3 أضعاف محطة رمسيس، وتشمل ورش للجرارات والعربات ومخازن وجراج ومول تجاري وأجزاء استثمارية ومجموعة من العمارات في مسير السكك الحديدية القديمة يشكل نشاط إداري وتجاري وسكني.
وتعد محطة قطارات صعيد مصر أحد أضخم مشروعات النقل في الشرق الأوسط، حيث تم إقامتها على مساحة 239 ألف م2، بما يعادل نحو 57 فدانًا، لتفوق بذلك مساحة محطة رمسيس بالقاهرة بـ3 أضعاف، وتتزين أعمال المحطة باحتوائها على هرم زجاجي كبير، ويشمل المشروع تنفيذ مبنى المحطة الرئيسي على مساحة 31.000 م2 بإجمالي مساحة بنائية 112.000 م2 وملحقات ومباني خدمية وورش صيانة وأرصفة، وكذلك خطوط سكك حديدية على مساحة 164.000 م2 وعمارات استثمارية على مساحة 44.000 م2.
