"الناس قالت إني اعتكفت وتدينت".. خالد علي يكشف أسباب اعتزاله الغناء

حل الفنان خالد علي ضيفا ببرنامج كلام الناس مع الإعلامية ياسمين عز الليلة على قناة MBC Masr، حيث من المقرر أن يكشف الكثير من التفاصيل بحياته الشخصية . 

حلقة خالد علي بكلام الناس 

كشف خالد علي عن أسباب اعتزاله الغناء وعلق قائلا : "الناس قالت عني حاجات كتير يعني أقل حاجة كانت إني اتدروشت، واللي اتقال كان أكتر من إني اتدروشت واعتكفت وتدينت واعتزلت" . 

وأضاف : "الحقيقة إن أنا ساعتها كنت في فترة كدة في حياتي مكنتش عايز أرد، لإني كنت في فترة جميلة جدا وكنت في مرحلة كدة هي نقلة في حياتي مش الفنية بس والشخصية كمان، وكنت في مرحلة جميلة سافرت السعودية وعملت عمرة، والعمرة دي عملت معايا نقلة نفسية، رجعت وربنا أراد أعمل الألبوم بتاعي، وربنا أراد إن الألبوم يتعطل شوية علشان أعمل أغنية للرسول صل الله عليه وسلم، حتى بعد ما عملت الأغنية دي حسيت إن صوتي اتغير وحلي خالص" . 

وتابع : "وأنا قولت الاغنية بصدق وقولتها بحب طبعا، ف كل حاجة اتغيرت وحسيت إن أنا أتمهل في ألبومي ومستعجلش وأدقق في الكلمات أكتر، وميبقاش كل الكلام هيصة ورقص قد ما يفرق معايا إني أنقي الكلام اكتر، وكان المرحوم مجدي النجار ليه دور معايا كبير اوي وهو كان ليه دور مع عمرو دياب ومحمد فؤاد وعامر منيب، لكن اللي عمله معايا بصفة خاصة كان نقلة جامدة اوي" . 

وصرح : "في الفترة دي كلام الناس شغال وبكثرة، هو بس كان يمكن الكلام بيتكتب علشان غيابي والناس اللي ليها إنها تشوفك، ف أنت مبتظهرش، طب أنا ليا ظروفي وهقول أكيد، ف كنت كل مرة أحب أطلع وأقول، لحد بقى كلمة اتدروش دي بقى اللي بتقتلني، طب أنتوا أنتوا جيبتوا منين لفظ اتدروش"