"أبو تريكة" كلمة السر.. إمام عاشور يكشف سبب اختياره رقم 22 بالأهلي
تحدث إمام عاشور نجم الأهلي عن اختياره رقم 22 وهو رقم الأسطورة محمد أبو تريكة مشيرًا إلى أنه قرر اختيار هذا الرقم رغم المسئولية الكبيرة.
وقال إمام عاشور في تصريحات تليفزيونية لبرنامج "حارس الأهلي" الذي يقدمه شوبير عبر قناة الأهلي: "من أمنيات حياتي أشوف تريكه وكلمت سيف ابنه قلتله نفسي اكلم الكابتن ودايما هو مفيش وقت متاح يتكلم فيه بس ان شاء الله جايلك قطر واشوفك بإذن الله".
وأضاف إمام عاشور: "أنا اللي اخترت رقم 22، كان فيه رقم 3 ورقم 11 قلت لكابتن خالد بيبو هاخد رقم 11 وقال لي عبد القادر عاوز رقم 11 وقال لي فيه 22 قلتله هاخد الرقم قاللي الرقم ده غالي عندنا كلنا قلتله إن شاء الله ابقى قدها وابقى غالي عندك أنا كمان".
واختتم امام عاشور حديثه: "لازم الواحد لما يلبس رقم كابتن أبو تريكه يكون على قد المسئولية وان شاء الله في مسيرتي مع الأهلي أحاول ابقى ربع كابتن أبو تريكة".
قفلت قصة الزمالك لعدم التقدير وشرف لأي حد يلعب في الأهلي
كشف إمام عاشور، نجم النادي الأهلي الحالي، مساء اليوم الأربعاء، تفاصيل انتقاله إلى النادي الأهلي بعد تعرضه للإصابة مع نادي ميتلاند.
وقال إمام عاشور، خلال تصريحات عبر برنامج «حارس الأهلي»، الذي يقدمه الإعلامي أحمد شوبير، عبر «قناة الأهلي»: بعد ما اتصابت مع ميتلاند وكيلي قالي أمير توفيق عايز يكلمك يتطمن عليك، فكلمني واطمئن عليا وقالي سلامتك ومكلمنيش في أي حاجة تخص الأهلي.
ويكمل إمام عاشور: وبعدها روحت الزمالك كنت بتعالج شهر ونص في النادي وقلت للناس هناك إني عايز أرجع لكن في مسؤول موجود دلوقتي في الزمالك قالي ادفع أنت الفلوس لنادي ميتلاند وتعالي، ولما الموضوع اتعقد لقيت وكيلي بيقولي أستاذ أمير توفيق هيكلمك؛ ومجرد ما كلمني قفلت قصة الزمالك خاصة إني ملقتش تقدير، وقلت له شرف لأي حد أنه يلعب للأهلي، ومجرد ما الناس في الزمالك عرفوا قصة الأهلي رجعوا يكلموني مردتش على حد.
وكشف نجم النادي الأهلي الحالي، إمام عاشور، عن بداية رحلته الكروية مؤكدًا أنها جاءت بالصدفة عندما توجه لمشاهدة مباراة لشقيقه مع فريق غزل المحلة وطلبوا منه اللعب مع الفريق بسبب غياب لاعب ثم بعد ذلك أرسل مسؤولي النادي أحدا إلى بيت اللاعب ليمضي معه ولعب في المحلة 15 سنة.
ندمان على تجربة ميتلاند لكن ربنا كرمني بالأفضل
قال إمام عاشور: لعبت بالصدفة في فريق غزل المحلة، كنت رايح اتفرج على ماتش محمد أخويا ونزلت لعبت علشان في لاعب غاب، مسؤولي المحلة طالبوا أخويا إني ألعب في النادي لدرجة بعتولي حد يمضيني في البيت الساعة 8 ونص الصبح، ولعبت في المحلة لمدة 15 سنة، وكنت أصغر لاعب يصعد للفريق الأول، بعدها رحلت لفريق حرس الحدود ولعبت به موسم واحد.
وتحدث النجم إمام عاشور، عن معاناته عقب ترك نادي ميتلاند الدنماركي وعودته إلى مصر قائلًا: لما كنت في الزمالك ماكنتش أعرف حاجة عن عرض ميتلاند الدنماركي، كان عندي كذا عرض في إسبانيا، بعد مباراة فيوتشر كنت عارف اني قاعد في النادي خصوصا اني جددت عقدي مع النادي.
ويكمل: مسؤولي الزمالك استدعوني الساعة 12 منتصف الليل وبلغوني إني همشي ووافقوا على عرض ميتلاند وبالفعل مضيت على العقود، قبلها بساعات كنت في مداخلة على قناة الزمالك وطارق يحيى ناشدني بالبقاء مع الزمالك، لكن بعدها قالولي اعمل مداخلة تاني بعد ما وقعت لنادي ميتلاند.
وتابع نجم النادي الأهلي، إمام عاشور: ندمان على تجربة ميتلاند لكن ربنا كرمني بالأفضل، معرفتش اتأقلم في الدنمارك وبعدها جاءت إصابتي فقررت الرحيل، الأن أنا في أفضل نادي في مصر وإفريقيا، كرم ربنا كبير.
أنا في أحسن نادي في أفريقيا دلوقتي
قال إمام عاشور : «كنت زعلان إن تجربة احترافي مكملتش بسبب إني معرفتش اتأقلم بسبب اللغة والأجواء»، متابعًا: «لكن أنا في أحسن نادي في أفريقيا دلوقتي، وأي حد يتمنى يلعب للأهلي ومحدش يقدر يرفض عرض الأهلي».
وأضاف إمام عاشور: «قولت لوكيل أعمالي أحمد يحيى عايز أرجع مصر، بس استغربت محدش رد عليا في الزمالك خالص عشان مكنش في فلوس».
وأتم: «في لاعب كبير كلمته ومردش عليا برضو، وفي إداري موجود دلوقتي في الجهاز الفني مكنش بيرد عليا خالص».
