عبد الله رشدي لـ محمد نجاتي: "اتقي الله في عملك يا فنان وأرضيه فيما تقدمونه للجمهور" (فيديو)

انتقد عبد الله رشدي، الباحث بوزارة الأوقاف، تصريحات الفنان محمد نجاتي بأن مهنة الفن أقوى بكثير من دكتور الجامعة وشيوخ المساجد.

وقال "رشدى": "طبعًا الكلام ده أنا في الحقيقة مش فاهم هل هو صدر منه أم لا؟.. ياريت يا نجاتي تفهمنا أنت قولت أيه تحديدًا.. لأن الصحافة أنا شخصيًا بينسب لي كلام أنا لما اقوله..إحنا عايزين نعرف حرفيًا هل أنت قولت الكلام ده؟.. ولو قولته كان في أي سياق؟".

وتابع "رشدي" خلال مقطع فيديو نشره على صفحته الشخصية عبر وسائل التواصل الاجتماعي "فيس بوك" قائلًا: "يعني أنت كنت في سياق بتوضح دور الفن مثلًا هو رسالة سامية وجيدة إذا أحسن استخدامه ولا أنت قصدك إنك تقلل من دور المسجد والتعليم الجامعي أو التعليم بشكل عام.. لأن الكلام غير واضح وسياق الكلام لا نعلمه والكلام اتقطع وطلع مانشيت والناس عماله تتكلم فإحنا مش فاهمين الدنيا ماشية إزاي.. رجاءًا لو سمحت وضح لنا إنك تقصد بأن الفن رسالة سامية وجيدة ومكملة للدور الذي يقوم به المسجد وفضيلة الإمام.. والدور الذي يقوم به الأستاذ والدكتور الجامعي.. والذي يقوم به المعلم في تعليمه.. لو أنت قصدك إن الفن ممكن أن يستخدم كوسيلة للتأكيد على المبادئ العلمية والخلقية التي يزرعها المدرس في تلامذته.. والتي يعلمها الشيخ أو الإمام لموارديه في المسجد ده كلام جميل جدًا وأنا أؤيدك فيه وأحييك عليه".

وأضاف "رشدي" قائلًا: "وده اللي بنقوله دايمًا لأخوانا الفنانين اتقوا الله في رسالتكم وفي ما تقدمونه للخلق.. الناس بتشوفوكم في التليفزيون أكتر ما بتشوف الشيخ.. الناس دلوقتي بقينا في حياة رقمية وحياة ديجتال وحياة إلكترونية.. الناس ممكن تحتك بيك أنت كـ "فنان" أكتر ما بتحتك بالشيخ وهو قاعد في المسجد.. فا اتقي الله في عملك يا فنان ويا فنانة في عملكما وارضيا الله فيما تقدمانه للجمهور.. فلو إنت قصدك المعنى ده فجميل جدًا.. ولذلك إحنا دايمًا بنقول للفنانين حرام تقدموا إسفاف حرام تقدموا قلة الأدب".

واستكمل "رشدي" قائلًا: "حرام تقدموا الألفاظ الشنيعة والقبيحة.. حرام تعلموا الناس الإيحاءات الجسدية.. حرام نطلع نمجد ونبجل في دور القاتل والبلطجي وأبو سنجة وسيف وسلاح واللي بيسرق آثار.. حرام نطلع الست لابسه أحداث صايحه وموضة يعني تلبس لبس مينفعش يتخرج بيه بره أوضة النوم وتقولك أنا بأدي عمل فني ورسالة.. إنتِ كده لا بتأدي عمل فني ورسالة.. إنتِ كده بتأدي قلة أدب.. وبتعرضي نفسك للناس على إنك سلعة جسدية مش إنك إنسانة لديها عقل وتفكر وتسطيع أن تستخدم موهبة الفن في إفادة الجماهير.. وقولنا قبل كده كونك بتمثلي ينبغي إلا تطلعي أو يظهر من جسد شيئًا سوا الوجه والكفيين وبدون تبرج.. ده لو إنتِ عايزة يكون أكل عيشك حلال وصح".

واستطرد "رشدي" قائلًا: "قولنا قبل كده لو حضرتك شغال فنان أو ممثل مينفعش تلمس واحدة ولا تحضنها ولا تبوسها ولا تطلع تشتم ولا تسب ولا تلعن.. أي حاجة ممكن تعملها على الشاشة تخالف ما ورد في الشرع الشريف حرام عليك تعملها ونسبة الأجر اللي بتاخده عليها حرام هي كمان.. فلو أنت قصدك يا أستاذ نجاتي الدور اللي أنا بقوله ده شئ جميل جدًا أو لو أنت قصدك أن مهنة الفن أو التمثيل أهم من المسجد والتعليم طبعًا ده كلام مرفوض جملة وتفصيلًا.. وأنا مش فاهم أنت قولت أيه ولا قصدك أيه.. وأنا بطرح تسائل وعايز أفهم أنا والناس الصورة".