حسين فهمي يستعيد ذكرياته مع فيلم "الرصاصة لا تزال في جيبي" بالإسماعيلية
ظهر الفنان حسين فهمي منذ قليل في ندوة خاصة أقيمت له تحت رعاية محافظ الإسماعيلية ليكشف العديد من الكواليس الخاصة بذكرياته مع محافظة الإسماعيلية وذلك بالأخص عند تصويره فيلم الرصاصة لا تزال في جيبي مع الفنان محمود ياسين .
ندوة حسين فهمي بالإسماعيلية
قال حسين فهمي خلال الندوة: "كان فيه كلمة سر كان لازم أي حد نازل يقول كلمة السر دي إذا كان أي حد عايز يتحرك، ف كنت بشوف الأيام دي وكنت بحزن لأن إحنا كنا على خط القناة كله وصورنا في فايد وصورنا في مطار فايد أكتر من فيلم غير الرصاصة لا تزال في جيبي" .
وأضاف : "وكنت بحزن جدا لما بشوف الحياة بالشكل ده، وأنا شوفت الإسماعيلية في هذه الأيام، وكنا بننزل يوم في الأسبوع وكان معايا محمود ياسين وصلاح السعدني وسعيد صالح، كنا بننزل يوم واحد في الأسبوع القاهرة نشوف أولادنا ونقضي ليلة واحدة وبعد كدة نرجع تاني نقضي أسبوع بحاله، وكان معانا رمسيس نجيب كان هو المنتج للفيلم وحسام الدين مصطفى المخرج، ف أنا شوفت الإسماعيلية في أيام كانت صعبة جدا" .
وتابع : "ومن أروع الأدوار اللي عملتها في حياتي خصوصا لما كنت واقف على خط بارليف وكنت ضابطا في الجيش المصري اللي عبر القناة في 6 أكتوبر، وكنت أنا أصلا جاي من أمريكا متدمر من حرب 5 يونيو هزيمة 67، ف أنا أساسا وقوفي على خط بارليف في هذه الفترة كان إحساس بالثأر بالنسبة لي كأنها مسألة شخصية" .
وأوضح : "ف أنا لما بشوف الإسماعيلية النهاردة في هذا الرونق شئ جميل جدا، يعني أنا كنت باجي الإسماعيلية على مدار سنوات طويلة ودلوقتي أنا شايف الإسماعيلية في أبهى شكلها والمتحف اللي شوفته كان رائع جدا، وأنا عندي آمال أن يبقى فيه نشاط ثقافي في الإسماعيلية يردلها تاني روحها اللي موجودة فيها وفي سكانها، لأن الإسماعيلية مدينة عظيمة جدا ومن أجمل المدن اللي ممكن الإنسان يشوفها"
