عمر مرموش: أمى بتدعيلى كتير واللى أنا فيه ده بسببها

كشف عمر مرموش، نجم منتخب مصر ونادي آينتراخت فرانكفورت عن أسلوبه فى اللعب قائلا : "مبلعبش أى ماتش بجزمة جديدة، وأول لبس لأى جزمة بتمرن بيها 4 أيام، ومش ديما بيغر الجزمة".

وأوضح مرموش: "أمى مش متابعة الكورة كويس، ومبتتفرجش على ماتشاتى لأنها بتكون قلقانة عليا، وبتقعد جمبى وانا بحضر الشنطة وبتقولى أحطلك حلاوة؟، واللى أنا فيه ده بسببها لأنها كانت بتوصلنى التمرين وتودينى المدرسة، ولما الناس عرفتنى قالتلى إيه اللى بيحصل ده انت عمر بتاعى.. ويا رب دايما أشرفها هى ووالدى وفضلهما كبير عليا".

وعن حياته فى ألمانيا قال مرموش خلال حواره مع الإعلامية إسعاد يونس، ببرنامج "صاحبة السعادة" المذاع على قناة dmc: "عايش لوحدى وبحب غزل البنات، وأمى بتدعيلى بكل حاجة حلوة، بتقولى (خلى بالك على نفسك وكل واشرب كويس)".

وعبّر عمر مرموش، نجم منتخب مصر ونادي آينتراخت فرانكفورت، عن حبه لشقيقه، قائلا: "أخويا مثلى الأعلى، وكنت بقلده، وكان بيفرجنى دايما على فيديوهات كورة، وكان مهتم بالكورة وكان حريف، وسريع وقوى".

وأضاف عمر مرموش: "وفى الكورة كنت بحب رونالدينيو، وكان لاعب كبير ومثلى الأعلى".

وتابع: "ملابسى ملهاش علاقة بموديل معين، وبحب المزيكا وباسمع كل الأنواع وبشغل الأغانى فى النادى منها أغنية (آه يا قلبى) للمطرب حكيم وبشغل أغانى شعبى، وبيرقصوا عليها فى النادى، وبديهم تقاليد مصرية وأغانى، وبحب السينما لكن مش بروحلها كتير وبلعب رياضة تانية"، وخلال الحلقة وبجو ملىء بالفكاهة والضحك ومن باب الدعابة وافقت إسعاد يونس وعمر مرموش على تقديم مرموش أفلام فى السينما خلال الفترة المقبلة.