مجدي عبد الغني: اتظلمت في بدايتي مع النادي الأهلي

تحدث الكابتن مجدي عبد الغني عن عدد من المواقف التي تعرض لها خلال مشواره الكروي، مشيرًا إلى أنه تعرض للظلم كثيرًا ولعل أبرزهم فترة بدايته مع النادي الأهلي.

وقال مجدي خلال لقائه مع الإعلامية إنجي هشام في برنامج أوضة ضلمة المذاع على شاشة قناة هي: مبندمش على حاجة عملتها، وباخد قراري وببقى مقتنع بيه أيًا كان عواقبه، ومندمتش وقت رجوعي من البرتغال وراجع بإيرادتي وكنت راجع بتمنى تبقى حياتي في النادي الأهلي.

وأردف: ربنا بينصرني على طول لما بتظلم وعلاقتي كويسة مع ربنا، واتظلمت وأنا بلعب كورة مكنتش بنزل التقسيمة وبقعد احتياطي وأقعد اتفرج عليهم ومكنتش متأيد في النادي الأهلي حتى وقتها.

وأضاف: بعتز وبفتخر إني أثبت وجودي في النادي الأهلي؛ لأن النادي الأهلي كان بالنسبة لي حلم.

كما تطرق في حديثه عن الجول الذي أحرزه في بطولة كأس العالم، وقال: اللي بيقول بهزار أنت ذلتنا يا كابتن بالجون بتاع كأس العالم بهزر معاه، واللي بيقولها بجد بسيبه يموت بحسرته، ولا بيفرق معايا ولا بعمله حساب؛ لأني لو مكنتش جبت الجون ده كان زماني متعلق في ميدان التحرير، أنا نزلت وقتها 10 مليون الشارع بيحتفلوا بالجون.

الجدير بالذكر أن برنامج أوضة ضلمة يذاع يوميًا على شاشة قناة هي، وتقدمه الإعلامية إنجي هشام، في تمام الساعة الثامنة مساءً.