الفنان الكبير أحمد كمال: بدأت اتدرب على التمثيل من وأنا عمري 6 سنين
قال الفنان الكبير أحمد كمال، :" لما أسمع لحن أو أغنية مؤثرة، ده بيخليني أسرح في شخصيات وأماكن وتجارب من أوقات سابقة، بسعد بيها كجزء من شخصيتي حتى وإن كانت قاسية".
وأضاف كمال ، في تصريحات خاصة لبرنامج سهرة نغم، تقديم محمد بكر على نغم إف إم :" أول ما اتعرفت من خلال فيلم "الكيت كات"، سافرت بعده مباشرة، وده كان قرار غريب بالنسبة للبعض، لكن أنا كنت شاعر إني محتاج أبعد".
وتابع :" وقت ما سافرت للخارج قررت مرة إني أهاجر للاستقرار بأمريكا، وقررت مرة أوروبا، لكن في النهاية تراجعت عن القرارين ورجعت لبلدي عشان خاطر بناتي وعشان خاطر عملي الفني".
وأكمل :" أثر الهجرة على شخصيتي، جعلني أهدى وأعمق، وأصبحت بشوف الأمور أوضح، لأنك لما بتبعد بتشوف الحياة بمنظور "عين الطائر" من فوق،" قائلا:" أنا مصري جدا وأعشق هذا البلد ولا أطيق البعد عنه".
وأشارالفنان الكبير أحمد كمال، الى :" نصيحة والدي ليا اللي لحد النهارده بفتكرها وبعمل بيها، وهي "ركز في اللي انت بتعمله عشان ما تضيعش".
وأوضح :"والدتي كانت دايما تدعي وتقولي "ربنا يحبب فيك خلقه"، وأنا حتى الآن بلمس أثر الدعوة دي في حياتي، وفعلا حب الناس هو اللي سندني وبيسندني في حياتي".
ولفت الفنان أحمد كمال :" أنا كمدرب للتمثيل، مش بشتغل مع تلامذتي فقط على المهارات ولكن أيضا على "القيم"، لأن فنان بلا قيم هو فنان بلا معنى،" متابعاً :" تاني شيء بشتغل عليه مع تلامذتي هو الإرادة، لإن الإرادة بتحتاج لتدريب مش بتكتسب لوحدها".
وأضاف :" التدريبات اللي بقوم بيها مع تلامذتي، بتكون بشكل عملي وليس تنظيري، بتدريبات دمها خفيف ومحملة بالقيم في نفس الوقت" متابعاً :" بعد ٣٠ سنة كمدرب تمثيل، أكتشفت إن الحكم الأول على موهبة الأشخاص اللي بيبدأوا مسيرتهم في التدريب مش دايما بيكون صح، ممكن خلال فترة التدريب يظهر عكس الإنطباع الاول سواء كان بالسلب او الإيجاب".
وأكد الفنان أحمد كمال ، أنة في عوامل كتير بتأثر في الموهبة، ممكن مرور وقت من الزمن أو فقدان للشغف والرغبة ، قائلا :" أنا لا اعتقد إني شخص متفائل للأسف، لإن عقلي طول الوقت مشغول ومثقل بأفكار أطور من خلالها تدريباتي لإني مش بحسب نفسي كمدرب فقط ولكن ك "باحث" في فنون التمثيل".
وأسترسل :" قدرة الإنسان على رؤية الأشياء الجميلة في الحياة، والشعور بيها وتقدير قيمتها، هي قدرة استثنائية، لإن ناس كتير ممكن تمر من جمب الجمال زي الزهور مثلا، ومتشفهوش او تنتبه ليه".
وأشار :" أنا بدأت اتدرب على التمثيل من وأنا عمري ٦ سنين، من خلال مدرستي مدرسة ابن خالدون، وفضلت طوال الفترة الإبتدائية بتدرب عليه وتعمق بداخلي، لدرجة إن بستعين بأجزاء من التدريبات ديه لحد النهاردة".
وإختتم الفنان أحمد كمال ، قالا :" من خلال رحلتي الطويلة مع الفن، اكتشفت أهمية الصبر وإن كل شيء ياخد وقته، ومفيش شيء اسمه ده عصر السرعة ده كلام خاطئ من وجهة نظري، وبيتم استخدامها لتشجيعنا على الاستهلاك دائما".
