جريمة تحرش فى نهار رمضان.. والضحية: ملوش غير الفضيحة وقلة القيمة والسجن (صور وفيديو)

وقالت ندى أحمد، عبر حسابها الشخصي بموقع "فيس بوك": "الساعة 9 صباحاً يوم 5 مايو الموافق 23 من رمضان محيط مبنى ماسبيرو أمام هيلتون رمسيس ميدان عبد المنعم رياض.. "متشبه بالرجال" عدى من جمبى وقال أبشع وأسفل الألفاظ بطريقة سريعة اللى هو بنصبح المهم شتمته وعمل نفسه مش واخد باله وعدانى بسرعة..خلص الموقف فى اليوم ده ودمى محروق.. ودى غلطتى".

وتابعت ضحية التحرش: "الساعة 9 صباحاً تااانى يوم 6 مايو أو 24 من رمضان فى نفس المكان ونفس المتحرش معدى من جمبى قال نفس الألفاظ بس المرة دى قالها بصوت أعلى.. قلت طلبها وهينولها.. طلعت موبايلى بسرعة وبدأت أصوره وأمشى وراه وناوية أروح القسم.. الناس فى الأول افتكرت إنها خناقة ما بين اتنين وانا بحاول مغلطش عشان صيامى وصوتى بيروح فمحدش بدأ يلتفت الا اما بدأت اقول حرامى ومتحرش وبصويت"، مضيفة: "ابتدا يجرى ما بين العربيات زى الفار وأنا وراه لحد أما الناس اتلمت وكان فى ظابط شرطة جالى والحمد لله الرجالة قامت بالواجب وزيادة".

وأتمت: "اللى عايزة اقوله فى البوست ده إن محدش يسكت عن حقه ونعمل شير للصور والفيديوهات.. وأى حد يقولك كلمة أو يعمل موقف طلعى موبايلك وافضحيه مش هيجوا إلا كده.. الحمد لله الدنيا لسة بخير فيها رجالة ولاد بلد وقفت جمبى النهاردة.. والمتحرش ملوش غير الفضيحة وقلة القيمة والضرب والسجن".