خمسينى يتحرش بفتاة داخل أتوبيس رمسيس.. والضحية: "مجاش فى بالى غير أنى أضربه"

وقالت الفتاة فى تصريحات خاصة لـ"مصر تايمز"، إنها كانت تستقل أتوبيس نقل عام من رمسيس إلى شبرا، وفوجئت برجل خمسيني فى المقعد خلفها يحاول لمسها بيده، متابعة أنها ظلت لحظات فى حالة من الصدمة.

وأضافت، كافة ركاب الأتوبيس تضامنوا معها ودعموها خلال الواقعة وأحدهم اعتدى على المتحرش بالضرب حتى أنزله من الأتوبيس، وقالت: "هو الراجل شكله كبير وغلبان.. وكان مستسلم وساكت طول ماهو بيتضرب.. ولولا أني متأكدة أن دي إيده اللي اتمدت عليا مكنتش أتخيل أنه يعمل كدة".

وتابعت "نهى": "لما شوفته بيعمل كدة دماغي وقفت وأول حاجة جت فى بالي أني أمسكه أضربه.. ومصورتهوش عشان مكنتش هقدر أستحمل أنه يفضل حاطط إيده عليا لحد ما أصوره"، مضيفة: "كان الصح أني أخده لأقرب قسم.. بس دماغي وقفت ومقدرتش مجاش فى بالي غير أني أطلع غلي فيه".

ووجهت الشابة رسالة لضحايا التحرش قائلة: "متخافيش.. المتحرش جبان وضعيف ومش هيقدر يعمل حاجة لأنه عارف ان اللي بيعمله ده غلط.. والصح أن لما بنت تتعرض لكدة تروح لأقرب قسم شرطة عشان تاخد حقها".

ونشرت "نهى" عبر حسابها الرسمى على موقع "فيس بوك" تفاصيل الواقعة قائلة: "قاعدة في الأتوبيس حسيت بحركة غريبة.. ببص جنبي لقيت الراجل اللي ورايا بيدخل إيده من جنب الكرسي وبيحطها على رجلي وبيحاول يتحرش بيا.. دماغي وقفت لحظة ومبقتش عارفة أعمل إيه".

وتابعت: "محستش بنفسي غير وأنا ماسكاه من التيشيرت بتاعه وعماله أضرب فيه.. وبعدها مسكته من الياقة بتاعت التيشيرت وقلتله انزل من الأتوبيس.. لقيته سمع الكلام ونازل فعلًا.. رحت وراه وشديته من ضهره وضربته على قفاه وبالقلم على وشه تاني.. الراجل وأنا بضربه مفتحش بؤه بنص كلمة.. وولد كان معانا في الأتوبيس مسكه بهدله من الضرب ونزله من الأتوبيس".

وأتمت: "الصراحة الناس كانت متضامنة جدا معايا.. الراجل كان شكله معدي الخمسين ولو حد شافه هيقول عليه طيب وغلبان".