"دافعوا عنى ونصفونى".. فتاة تروى تجربتها مع الـ"بوركينى" بأحد الفنادق بالغردقة

وقالت "هدير": "بمناسبة الهوجة بتاعة البوركينى والمهزلة اللى بتحصل اليومين دول فا أنا بصراحة حابة انقل تجربة إيجابية حصلت معايا فى الموضوع ، أنا من فترة كنت فى اوتيل فى الغردقة تحديدًا فى سهل حشيش و اتعرضنا انا واختي فى البسين لموقف عنصرى من أحد السائحات اللى كانوا في المكان لما شافتنا نازلين بالبوركيني فضلت باصالنا فترة بطريقة مريبة و قامت قالت للايف جارد فيما معناه اللي فهمته انها معترضة و ازاي ننزل كدا ! .. طبعا انا من اللي بسمعه اصلا و قلة الذوق اللي بتحصل توقعت ان الاوتيل يقف في صفها فانا توقعت هيحصل مشكلة! المفجأة بقى ان اللايف جارد وقف في صفنا كأنه ابونا".

وتابعت "هدير": "و حاول يفهمها ان دا swim suit مناسب للبسين ، ولكن الست عندًا فينا و في المكان راحت لبست تي شيرت قطن و قامت نطت في المايه قال يعني هي كدا لابسة زينا و مينفعش حد يمنعها ، اللايف جارد مسكتش و طلعها من البيسين و حصلت مشكلة مع المكان و برضه الاوتيل وقف في صفنا احنا و قالولي انزل زي ما انا عاوزة في اي بسين براحتي و بصراحة بعيدا عن كدا كنا بنتعامل هناك احسن معاملة من stuff كله..

وبجد احب اشكرهم على زوقهم و طريقة التعامل المحترمة مع الموقف و زي ما في اماكن بتتعامل مع الموضوع بطريقة عنصرية  جاهله في أماكن فعلا محترمة لازم نتكلم عنها يمكن دا يساعد و لو مساعد بسيطة في ان يكون في وعي اكتر من كدا و اماكن تانية تبطل عنصرية".