محمد يحيى يكشف الكواليس الصعبة لأغنية عمرو دياب الجديدة "أحلى ونص"

كشف محمد يحيى، ملحن أغنية "أحلى ونص" للفنان عمرو دياب، عن كواليس صناعتها.

كتب يحيى عبر صفحته على موقع التواصل الاجتماعي" "فيس بوك"، قائلا: "أحلي ونص دي من الأغاني اللي هتفضل كواليس تلحينها في خيالي دايما عارفين ليه؟".

أوضح: "بصوا أنا من شهرين جالي أصعب دور كورونا تقريبا، كان هيقضي عليا وأنا بطبعي مبحبش أكتب عن أي حاجة سلبية، يعني جاتلي كده وأنا مش معرف حد".

أضاف محمد يحيى: " في اليوم الخامس من الكورونا يعني في عز المعمعه والتعب لقيت عمرو دياب بيكلمني بيقولي أيمن بعتلوا موضوع كلام حلو، سمعني الكلام وأقسم بالله حرفيا كنت بموت من التعب، قلت لعمرو الكلام رهيب وأنا عندي كورونا بس الأعراض خفيفة هقوم اشتغل".

تابع: " وفعلا قفلت مع عمرو وقاومت وقمت من علي السرير وصوتي مش طالع مسكت جيتاري ولحنتها، وطلعت وان شوت، بعدها بنص ساعة اتصلت بعمرو سمعها، طار وقالي تحفه عشان كده مش هنسي ظروف تلحينها".

أشار يحيى: " خلاصة الكلام الأسرارعلي النجاح ده دافع أوقات بيكون أقوي من أي ظروف، طبعا أنا مش قصدي بالحكايه دي أني أقول أني بطل العالم والجو ده، أنا بس من فرحتي بالأغنية دي عشان قد أيه وأنا بعملها كنت خايف من الكورونا قوي النهاردة لما سمعتها حسيت بيها حبيت أعرفكم".

اختتم محمد يحيى حديثه عن أغنية "أحلى ونص" موضحا: " معلومة مهمة، عمرو دياب في عز الكورونا كان كل يوم يحفزني ويقولي متخافش مش هسيبك، أنا عايز أشكره وأقولك مبروك يا هضبة".