"الفضيحة دلوقتى مبقتش فضيحتى".. فتاة تخرج عن صمتها وتروى قصص تعرضها للتحرش

تداول رواد موقع التواصل الاجتماعى "فيس بوك"، منشور عن تعرض فتاة تدعى "ياسمين" للتهديد من أهل شاب تحرش بها؛ إضافةً إلى قيامهم بالتردد على منزلها وسؤال الجيران عنها بصورة متكررة، بعد أن قامت باتخاذ الإجراءات القانونية تجاه ابنهم الذى تحرش بها.

وقالت "ياسمين" عبر حسابها الشخصي على موقع "فيس بوك": "أنا بطلب من النيابة والشرطة المصرية حمايتي من أهل المتحرش اللي اعتدى عليا وبطالب بحماية سرية بياناتي زي ما المباحث طلبت مني حماية هوية المتحرش وعدم نشر صورته أو أرقام عربيته لحد ما آخد حكم وأنا سمعت الكلام ولم  أنشر أي صور خاصة بيه لكن القسم لم يحمي بياناتي وأهله توصلوا لكل بياناتي وعنوان بيتي وبيترددوا عليه يومياً".

وتابعت: "قبل العيد أنا نزلت بوست إن تم التحرش بيا واخدت الإجراءات القانونية ودلوقتي بتفاجئ بأهل الجاني بعد تحويل الملف للنيابة وبقت جناية هتك عرض بترددهم على بيتى لـ 3 أيام ورا بعض وسؤال الجيران عليا علشان يحاولوا يستعطفوني علشان أتنازل".

وأضافت: "الجاني المتحرش هاتك العرض الغير محترم عنده 27 سنة متجوز من سنتين وعنده بنت ومراته سيباله البيت علشان مستعرية منه وأهله جايين طالبين السماح؛ لأن بيته هيتخرب وأمه عيانة والعيلة اتدمرت والبيت اتخرب وده "عيل".

واستكملت: "العيل دة مخافش على سمعته وأمه وأبوه العيانين ومراته وبنته اللي عمرها شهور أنا هخاف عليهم ليه؟..العيل دة محطش أمه وأخته وبنته مكاني وبكل قلة أدب مد إيده عليا واتحرش بيا أنا هحط نفسي مكانهم ليه؟ .. العيل دة ذل أهله و خرب بيته و حط راسهم في الأرض و دمر مستقبله أنا مالي ؟ ..أنا مين يحميني؟ انا ليه عنواني بالتفصيل يوصل لأهل الجاني؟ مين يحمي بياناتي ؟.. أنا روحت استنجد بالشرطة علشان تجيبلي حقي واول حاجة أتقالت متحطيش أي صورة ليه علشان حقك يرجع ونفذت دة ومحدش لسة يعرف شكله ايه؟ ليه أنا أحافظ على سرية شكله وأرقام عربيته والشرطة أديتهم بياناتي؟ ..أنا بطالب بحمايتي من أهل الجاني وبطالب بحماية بيانتي اللي بتسريبها تم تعريضي وتعريض أهلي للخطر وبطالب من كل المنظمات و الجهات المعنية بحمايتي زي ما طالبتوني بحماية بيانات وهوية الجاني أنا بجد حاسة أني مشلولة ومكشوفة ومتعرية ".

وكانت "ياسمين عمر" قد نشرت على حسابها الخاص بموقع التواصل الإجتماعى "فيس بوك" يوم 13  يوليو الماضى منشور قامت فيه بالخروج عن صمتها واعلنت فيه تعرضها للتحرش من طفولتها حتى الأن وعدد مرات التحرش تبلغ 3 مرات وذكرت أن ما ترويه هذا جزء لا يتجزأ مما تعرضت له.

وقالت "ياسمين": "خليني أقول حاجة علشان إنهاردة سمعت جملة" متفضحيش نفسك" كذا مرة  واللي هقوله يمكن اهلى اول مرة يعرفوه.. أول مرة تم التحرش بيا كان في بيت خالي من الشيخ اللى بيحفظنا قرآن كنت 6 سنين ".

وتابعت : "تاني مرة كنت نفس السن من صاحب مكتبة تحت البيت فتح سوستة بنطلونه وكان بيحاول يبوسني غصب عني لحد ما أنا جريت .. التالتة كانت في الجامع الشيخ اللي بيسمعلنا القرآن كان بيلبس جلابية كدة ولامؤاخذة يفتح يرجله وهو عريان من تحت.. وبعدين بقى من وأنا لسة في حضانة لحد إنهاردة من مدرسة لنادي لشارع لمواصلات لچيم لشغل لشارع وحتى وأنا في عربيتي أياً ماكان لبسي أية، شكلي أية، سني أية كان بيتم التحرش بيا".

واستكملت" : أنا بقى شايفة أن الفضيحة دلوقتي مبقتش فضيحتي دي بقت فضيحة كل واحد قاعد بيشوف كلامي دة وعارف نفسه أنا أول مرة بصراحة انهاردة أحترم نفسي واقدرها وأقرر أني أعمل حاجة غير اني أحط راسي في الأرض علشان عيني متجيش في عين واحد يبص بصة على جسمي تعريني أو يقول لفظ يوجعني..علماً بس لأني قولت جزء صغير أوي وهحتفظ بالباقي لنفسي علشان أحافظ على مشاعر السادة القراء وأهلي بس الجزء البشع أنا لسة محكيتوش ويمكن يجي اليوم واحكيه".