ضحية التعدى بالضرب من موظف تأمين بالإسكندرية: " ضربنى وشتمنى بأمى"(خاص)
الجمعة 27/أغسطس/2021 - 09:57 م
كشف "بسام محمد"، حقيقة تعدى موظف تأمين عليه بمنطقة الدخيلة، التابعة لمحافظة الإسكندرية، حيث قام "أحمد حلمى" بإهانته والإعتداء عليه بالضرب لمجرد سؤال المواطن "بسام" عن مكان وجود أوراقه الخاصة الذى من المقرر اعطائها لهم حتى يتلقى مستحقاته بعد تعافيه؛ وذلك بعد طلب بأخذه إجازة مرضية.
قال "بسام محمد" فى تصريحات خاصة لـ"مصر تايمز": " أنا أخدت إجازة مرضية من شغلى وبعد مارجعت طلبت فلوس ليا كانت المفروض أخدها وأنى أودى ورقى تبع المكان الحكومى اللى فى الدخيلة ده ..سابونى أسبوع وبعدها كلمونى قالولى أن ورقى المفروض تبع مكان تانى وبلغونى أروح أخد ورقى".
وتابع "بسام": " روحت عشان اخد ورقى قالولى أنزل الدور الأرضى ولما نزلت لقيت موظف التأمين "أحمد .ح" ده بيزعقلى وبيتشمنى بأمى وبألفاظ بذيئة.. وتعدى عليا بالضرب وأنا صورته ولما سألتهم عن أسمه قالولى أسمه فلان وسمعته وحشة فى كل حتة وأن من حقى اشتكيه".
وتداول رواد موقع التواصل الإجتماعى "فيس بوك"، مقطع فيديو يتضمن تعدى موظف بتأمينات الدخيلة التابعة لمحافظة الإسكندرية على أحد المواطنين بالضرب وتوجيه له العديد من الإهانات بالألفاظ البذيئة.
وقال الشاب " بسام محمد": " لحد إمتى هنفضل كدا.. ساعدونى يا جماعة عشان أقدر أخد حقى.. موظف فى تأمينات الدخيلة أعتدى عليا وشتمنى أمام الجميع وقدمت محضر بالواقعة ومصوره فيديو بتلفونى".
واستكمل: " أنا روحت قسم شرطة الدخيلة وعملتله محضر برقم 10796 لسنة 2021 ومستنيهم يكلمونى..أنا مش عايز حاجة غير أن حقى يرجع..أنا ماليش خلافات معاه ومعرفش ليه يتهجم عليا ويعمل كدا مين أداله حق يعمل كدا".
