الإثنين 25 أكتوبر 2021 الموافق 19 ربيع الأول 1443
رئيس التحرير
حازم عادل
محمد عدلى
محمد عدلى

قلب الترابيزة

الإثنين 11/أكتوبر/2021 - 04:05 م

مشهد 1          نهار / داخلي
هايبر ماركت
- لقطة واسعة لسيدة أربعينية تسير داخل أحد المتاجر الكبيرة وهي تدفع عربة بها العديد من الأغراض المنزلية والطعام  
- يسير من خلفها عدد من الأشخاص الذين يجرون نفس العربة مع اختلاف الأغراض
- تقف السيدة أمام ماكينة الكاشير وتبدأ في وضع الأغراض أمامه (علب لبن – أكياس مكرونة – لحوم – أطباق من الجبن المتنوعة)
- يأخذ عامل الكاشير كل طبق على حدى ويمرره على جهاز الباركود
- العامل: الدفع فيزا ولا كاش؟
_ السيدة: لا كاش
تخرج من حقيبتها المحفظة وتتفاجيء عندما تفتحها أنه تحتوي على 200 جنيه فقط
تبحث في باقي جيوب المحفظة لا تجد أموال.. تبحث كذلك في حقيبتها كلها لا تجد أي أموال 
- السيدة ( وهي مندهشة) : خلاص هدفع فيزا بعد اذنك
- عامل الكاشير : تحت أمرك يا فندم
قطع

مشهد 2      نهار/ داخلي
شقة / الصالة
- تفتح السيدة باب الشقة وتدخل ثم تضع الأغراض على السفرة 
- تتجه بعدها ناحية ممر الغرف المقابل للصالة
قطع

مشهد 3        نهار/داخلي
شقة / غرفة الابن
- تدخل السيدة أحدى الغرف وتفتح النور 
- نرى شاب في العشرين من عمره نائما على سرير
- الشاب ( يفتح عينه وهو منزعجا من فتح أمه للنور)
- الشاب: اقفلي النور يا ماما عاوز انام
- تدخل أمه الغرفة وتجلس على طرف السرير
- السيدة : معلش يا مهاب قوم هسألك على حاجة وأرجع نام
- يقوم مهاب من نومته ويجلس على السرير 
- مهاب :فيه ايه يا ماما .. انا راجع الصبح ومش قادر
الأم: ابوك لما اتصل انا قلتله انك راجع من بدري ونايم 
- مش معنى أنه مسافر لشغل أنك تعمل اللي على مزاجك يا مهاب
- أنا بدافع عنك وبسيبك تعمل اللي أنت عاوزه بس لازم تاخد بالك
- مهاب (باستهزاء) : أيوة يعني أنتي مصحياني عشان تسمعيني الكلمتين دول؟ 
- الأم: لا .. أنا مصحياك عشان اعرف الفلوس اللي كانت في محفظتي امبارح راحت فين؟
المحفظة كان فيها الفين جنيه 
ببص فيها الصبح مالقتش غير 200 جنيه
- مهاب: ماعرفش .. شوفي البنت اللي بتيجي تساعدك في البيت.. جايز ايديها طويلة ولا حاجة
- الأم: ماحدش دخل الشقة امبارح يا مهاب غيري أنا وأنت.. وأنا متأكدة ان الفلوس كانت في محفظتي وعداهم عشان كنت نازلة بدري اشتري حاجات للبيت
- مهاب( بمنتهى الاستهتار والبجاحة)
- انتي عاوزة توصلي لأيه يا ماما؟
- اني انا اللي خدت الفلوس من المحفظة؟
- ايوة انا اللي اخدتهم وعملتها قبل كدة اكتر من مرة 
- وانتي عملتي مش واخدة بالك 
- اشمعنى يعني المرة دي اللي محبكاها اوي؟
- الام: أنا بعديها لما الاقي الفلوس ناقصة 100 أو 50 وبقول وماله ما هي فلوسه
لكن تمد ايديك وتاخد كل الفلوس اللي في المحفظة.. دي اسمها سرقة يا مهاب
- مهاب: ماحدش بيسرق فلوسه.. وفلوس أهلي دي فلوسي
- الأم: مين اللي فهمك كدة ؟
- لما يبقى من وراهم ماتبقاش فلوسك
- مهاب ( يغير نبرته مصطنعا الضعف)
- وانا يعني هعمل ايه يا ماما؟
- عاجبك المصروف اللي باخده من بابا 
- بيكسب كويس اوي ومعاه فلوس كتير
- وبيدي ابنه فلوس ماتقضيش عيل صغير 
- لما بنزل مع صحابي بناكل برا كل يوم وبنقعد بعدها في مكان والأسعار غالية
- واتكلمت مع بابا كتير وانتي كلمتيه كتير وبرضو مش عاوز يزود المصروف
- غصب عني بشوف الفلوس في محفظتك باخد منها
- الأم: أنا عارفة ان مصروفك قليل
- بس انا بديك اللي انت عاوزه
- ليه بتمد ايديك من ورايا؟
- مهاب: بتديني كام، 100 جنيه ولا 200، مابيكفوش برضو
- الأم: طيب أنا مش هقول لبابا المرة دي 
- بس ممكن توعدني انك ماتكررهاش تاني؟
- مهاب: حاضر حاضر، ان شاء الله 
- ينام مهاب على السرير
- مهاب: اقفلي النور بقى وانتي خارجة

ads
ads
ما هو أفضل مشروع قومى فى مصر خلال الفترة الأخيرة؟

ما هو أفضل مشروع قومى فى مصر خلال الفترة الأخيرة؟