الجمعة 29 مارس 2024 الموافق 19 رمضان 1445
رئيس التحرير
حازم عادل
مقالات الرأى

اكسر للبنت ضلع!

الأربعاء 20/أكتوبر/2021 - 09:50 م

مشهد1        ليل/داخلي
شقة سكنية /الصالة
لقطة واسعة تجمع مجموعة من الأصدقاء منهم سيدة ثلاثينية ذراعها مكسور وموضوع داخل جبيرة من الجبس
 يقفون جميعا امام سفرة عليها تورته وبعض الحلوى 
المجموعة
يالا حالا بالا بالا حيوا ابو الفصاد
هيكون عيد ميلاده الليلة احسن الاعياد 
فليحيا ابو الفصاد 
هيييييه
يطفون جميعا تورتة العيد ميلاد 
احد الشباب الحاضرين
يلا يا جماعة نقطع التورتة 
احدى الفتيات 
قطعوها انتو يلا (تمسك الفتاة المكسورة من ذراعها السليم
وتعالي إنتي يا ناهد عاوزاكي ثواني
تأخذ هذه الفتاة ناهد ويدخلان غرفة مجاورة

مشهد2        ليل/داخلي
شقة سكنية /الغرفة
تجلس ناهد مع الفتاة 
الفتاة
بقولك ايه ..
 انا موضوع انك وقعتي من على السلم ودراعك اتكسر دا مش داخل دماغي
ايه اللي حصل يا ناهد؟

ناهد ( وهي مترددة)
هيكون ايه اللي حصل يعني؟! 
وانا اصلا هكدب ليه 

الفتاة
ماعرفش بقى 
زي المرة اللي كانت عينيكي وارمة وقال ايه تقريبا ناموسة قرصتك وانتي نامية
هو احنا عبط يا ناهد.. كل اللي برا دول عارفين ان محمود بيضربك 
اللي مش فاهمينه انتي ليه ساكتة ورافضة حتى تشتكي

ناهد
على فكرة بقى انتو ماتعرفوش محمود كويس
محمود رغم انه عصبي بس طيب جدا 
وبيعاملني كويس جدا 
انا لو حكتلك بيعمل معايا ايه مش هتصدقي
قطع

مشهد3 فلاش باك         ليل/داخلي
شقة سكنية 2/ المطبخ
تقف ناهد في المطبخ ويظهر عليها التوتر
تخرج من الثلاجة دجاجة مازالت مجمدة وتفتح عليها المياه الساخنة
تذهب ناحية البوتاجاز وتفتح حلة الرز وتقلبها سريعا
يدخل محمود زوجها ويبدو عليها العصبية 
يمسك الدجاجة ويرميها على الأرض 
تقف امامه ناهد خائفة لا تتحرك فيصفعها بالقلم على وجهها

صوت ناهد ( معلقا على الأحداث)
طب دا حتى مرة من يومين كدة رجعت من الشغل متأخر 
ويادوب بطلع الفراخ من الفريزر لاقيتها مجمدة وقدامها يجي ساعتين عشان تفك
لاقيته داخل عليا المطبخ وبمنتهى الحنية طبطب عليها وباسني على خدي
 وقالي ولا يهمك يا حبيبتي
هنطلب اكل من برا
قطع

مشهد4        ليل/داخلي
شقة سكنية 2/غرفة النوم
تدخل ناهد من باب الغرفة 
تجد محمود نائما على السرير وفي يده هاتفه ويكتب في الشات ويبدو عليه السعادة 
تقف امامه وتوجه له كلمه فيغضب كثيرا ويلقي هاتفه على السرير 
وينهض وهو يشير لها بإشارة كأنه يقول ( انتي مجنونة)
ثم يدفعها بقوه فتسقط على الأرض
صوت ناهد ( معلقا على الأحداث)
تعرفي مرة دخلت عليه متعصبه اوي وبقول مين منى دي اللي انت بتعملها لاف على صورها وبشوفك بتكلمها كتير على الشات 
لاقيته خدني في خضنح واحتواني وقالي لو دا بيضايقيك مش هعمله تاني ابدا
قطع
مشهد5       ليل/داخلي
شقة سكنية 1/الغرفة
كلوز على وجه صديقة ناهد ويبدو عليها عدم الاقتناع بكلام وحكايات ناهد
يدخل احد الاصدقاء من باب الغرفة
احد الاصدقاء
يلا عشان تاكلوا التورتة.. هياكلوها كلها انا ماليش دعوة
صديقة ناهد
جاييين اهو خلاص
تستمع ناهد لرنة الواتساب الخاصة بهاتفه
تخرجه من حقيبتها فتجد رسالة من محمود
تفتحها وتضع الهاتف على أذنها لسماعها

صوت محمود
انا مستنيكي تحت .. 
دقيقة لو مالقتكيش قدامي تروحي على بيت ابوكي وماشوفش وشك النهاردة
تغلق ناهد الهاتف وتضعه في حقيبته 
ناهد ( لصديقتها)
انا لازم انزل حالا عشان محمود حبيبي مستنيني تحت يوصلني..
شوفتي بقى انك ظالماه