الزوجة الأصيلة رزق".. سيدة تساعد زوجها فى صيانة التكيفات لكسب قوت يومهم بالحلال

وقالت إحدى السيدات على موقع التواصل الاجتماعى، "اتصلت بواحد اول مره اكلمه علشان يصلح التكييف النهارده في الجو ده وقالي هجيلك حاضر  بسأله حضرتك هتيجي منين ؟ قالي من غزاله قولتله لا لو مفيش شغل غيري متنزلش في الجو ده واكدت عليه انه حرام ينزل مخصوص ف البرد ده".

وتابعت " قالي خليها على الله ما اكيد حضراتكم محتاجينه بردو عشان البرد ده .. تمام .. جالي ف معاده بالظبط وكان بعد المغرب و بيقولي :معايا المساعد بتاعي بس متتفاجئيش حضرتك !.

مفهمتش ايه اللي هيفاجئني غير ان المساعد مثلا يكون حد معروف .. المهم لقيت بنوته قمرايه جايه معاه تساعده لإن مفيش مساعدين عاوزين ينزلوا معاه في الجو ده فقالتله انا هاجي معاك هساعدك وعرفت انها مراته .. وفعلا واقفه معاه تناوله كل حاجه وتغسل الفلاتر وعلى فكره هما شباب صغيرين و هي بنوته زي القمر ماشاء الله يتخاف عليها".

واستطردت" الست لقت انه جوزها راجل بيسعى على رزقه و عاوز يشتغل ويشوف اكل عيشه ومحدش معاه فأصرت انها تساعده ومش عارفه اوصفلكم الجمال اللي انا حسيته وهو بيطلب منها المفك او المفتاح الفلاني وبيوصفلها شكله لانها اول مره تتعامل ومتعرفش اي حاجه ويضحكوا عشان هي مش فاهمه ايه المفك الچي إم وايه هو المفتاح الفرنساوي ، وانا في الدور ال11 والجو تلج عليهم وعملوا شغلهم و غسلوا الكومبريسور و الفلاتر و رجعوا كل حاجه زي ماكانت زي الفل .

ادعولهم كتير والنبي ربنا يبارك ف حياتهم و رزقهم و اولادهم الاطفال اللي سابوهم عند جدهم.. وجايين مشوار طويل بالليل وشايليين كذا شنطه و امبوبتين فريون في البرد علشان اكل عيشهم .. ولا عن خضتها لما شافته طلع وقف ع الكومبريسور من بره الشباك واحنا في الدور ال11 ، اول مرة تشوفه كده (انا شخصيا انفعلت لما شوفته وقولتله مش عاوزه تكييف خالص ادخل لو سمحت ومش سامعني أساسا).