رئيس الإسماعيلي: "عمرنا ما هنكسب بطولات في وجود الأهلي".. ورد ناري من عبد الحفيظ

وقال يحيي الكومي في تصريحات لقناة "ام بي سي مصر"، "النادي الأهلي تاريخ عظيم وجماهير عظيمة ومنظومة جميلة لكن عشان يبقي في منافسة لازم يدوا فرصة للاسماعيلي والاتحاد والمصري والزمالك، كل الاستديوهات التحليلة هتلاقي 3 أهلاوية و واحد اسماعيلي، الأهلي بياخد 300 مليون من الشركة الراعية وأنا باخد 30 مليون جنيه، إزاي هنافس الأهلي على حصد البطولات، كده الإسماعيلي عمره ما هيبقى بطل في وجود الأهلي".

ورد سيد عبد الحفيظ: "حضرتك بتتكلم عن القيمة التسويقية للأهلي، أنت عشان توصل لـ 300 مليون او 400 أو مليار حتي، ده عشان الانجازات والبطولات اللي حققتها في الـ 10 ولا 12 سنة اللي فاتوا، فعشان تساوي نفسك بالأهلي لازم تحقق الأرقام والبطولات اللي بيحققها الأهلي".

وأضاف مدير الكرة بالنادي الأهلي، "ولو ربطنا الموضوع بالقاعدة الشعبية فنسبة وتناسب انت 10 وأنا 100، وكمان لو هنتكلم في جزئية الحته الاعلامية والقيمة الاعلامية والاستديوهات التحليلية رغم انها معلومة مش صح من الأساس، بس ايه علاقة ده بالملعب، يعني النهاردة لو في 10 بيحللوا المباراة ولا بيذيعوا المباراة، مال ده ومال الملعب اللي بيكون فيه 11 قدام 11".

وتابع، "في النهاية أحب أقول لحضرتك عشان تبدأ تقول أنا عايز 500 مليون ولا 600 ولا 700 مليون كقيمة تسويقية لازم يبقي عندي قاعدة شعبية عالية جداً وقاعدة بطولات كبيرة ، القيمة التسويقية دي بتجيلك من حاجتين يا البث التليفزيوني او الرعاة، طب الرعاة دول بيجولك ليه، مش معقوله الناس والشركات دي بترمي فلوسها في الأرض، الناس دي بتنزل على أرض الواقع وبتعمل احصائياتها، وبيكونوا عارفين الأعداد المباشرة اللي بتشاهد الأهلي اد ايه واللي بيشوفوا الاسماعيلي اد ايه واللي بيشوفوا الزمالك أد ايه، عشان كده بتلاقي سعر الاعلان اللي بيكون موجود وقت ماتشات الأهلي بيساوي 10 أضعاف نفس الاعلان لما بيكون موجود وقت ماتشات الأندية الأخرى".