حارس مرمي منتخب مصر: منظر الكأس قدامنا وضاع مننا كان صعب.. وظروف اللعب فى الكاميرون صعبة.. أبو جبل: أنا صعيدى ومش هسيب تارى مع السنغال..ويكشف سر الصورة الأشهر مع محمد صلاح

وقال قطب أبو جبل ، والد محمد أبو جبل حارس مرمى نادى الزمالك والمنتخب، " شوفت جبل جبل عالي فرح 120 مليون مصرى.. كنت بتابع الماتشات كلها"، متابعا،" كنت بصلي الفجر وأدعيه وأقوله ربنا ينصرك يا محمد يا ابنى".

وتابع فى مداخلة مع الإعلامى عمرو أديب، " راضيين عنه.. محمد طيب وبيحب الناس كلها.. وكنت خايف عليه فى ماتش المغرب بس الحمد لله ابنى جبل صح"، متابعا،" من أول البطولة والمندرة والبلد كلها بتتجمع عندى تشوف الماتشات".

وقالت والدة محمد أبو جبل حارس مرمى نادى الزمالك والمنتخب، " قلبي كان بيوقع لما كان بيتصاب فى المبارايات وكنت بدعيله ربنا عالطول وبقوله ربنا يوفقك"، متابعة" بعمله عالطول حمام وفراخ.. ده قلبي وروحى وكل حتة فيا".

وعلق محمد أبو جبل على مداخلة والدته مع الإعلامى عمرو أديب ببرنامج الحكاية، " امبارح والدتى تعبت ودخلت المستشفى بعد الخسارة أمام السنغال لانها كانت حاسة قد إيه أنا زعلان وزيها زى المصريين كانت نفسها نكسب".

وكشف  محمد أبو جبل حارس مرمى نادى الزمالك والمنتخب،  عن رسالة الجامبي بكاري جاساما حكم مباراة مصر والكاميرون، لهم قبل المباراة، قائلا،" من قبل المباراة وهو كان بيستفزنا وقالنا هتخسروا هتخسروا واتخانق معانا كلنا"، متابعا،" كان بيمسك ال id بتاع محمد صلاح بطريقة غريبة.. وكان غريب معانا".

وقال أبو جبل ، " أنا راجل صعيدى وعمرى ما هسيب حقى .. احنا عندنا تار مع السنغال وهنحتفل بالفوز عليهم فى بلدهم الماتش الجاى".

وتابع " منظر الكأس قدامنا وضاع مننا كان صعب .. وكنا عايزين نأخد البطولة إهداء للمصريين اللي كانوا بيشجعونا.. الصورة كانت صعبة".

وأوضح أن ظروف اللعب فى الكاميرون كانت صعبة للغاية ودرجة الحرارة كانت 40 ، ومستوى خدمة الفنادق كان صعب قائلا" كنا بننزل من الغرفة للمطعم نعرق".

وقال فى لقاءه مع الإعلامى عمرو أديب ببرنامج الحكاية ، أن تمرينات عصام الحضرى لحراس المرمى 25 دقيقة ولا صحة لما تردد عن أن إصابتى وإصابة محمد الشناوى نتيجة التدريبات القاسية لعصام الحضرى، متابعا،" لو التدريبات صعبة كنا اتصابنا أثناء التدريب ولكن إصابتنا كانت فى الملعب". 

وأوضح أن محمد الشناوى قال له بعد إصابة الأخير ونزول أبو جبل مكانه،" شد ولو جات ضربات جزاء عارف إنك هتصد"، متابعا" كلنا كحراس مرمى عندنا ثقة فى بعضنا البعض وأنا كان عندى إصرار إن ألعب حباً فى بلدى".

وقال محمد أبو جبل ، " أنا عشت حياة صعبة فى الكرة وبمجرد ما الشناوى اتصاب أنا لبست جوانتي ووقفت على الخط بسرعة عايزة أنزل". 

وقال محمد أبو جبل حارس مرمى نادى الزمالك والمنتخب، فى لقاءه مع الإعلامى عمرو أديب ببرنامج الحكاية ، أنه كان يتوقع وصول منتخب مصر للنهائى فى بطولة كأس الأمم الإفريقية 2021، متابعا، " كان عندى ثقة كبيرة إن هلعب فى البطولة"

وعلق محمد أبو جبل حارس مرمى نادى الزمالك والمنتخب، على خسارة لقب كأس الأمم الإفريقية 2021 أمام نظيره السنغالى. 

وقال محمد أبو جبل عبر حسابه الشخصى بموقع التواصل الاجتماعى "تويتر": "الحمد لله على كل شىء، الروح والإصرار والعزيمة اللى كانت فى لاعبى منتخب مصر ما هى إلا إصرار وروح وعزيمة شعب كامل حسينه إنه بيمدنا بيها، كان نفسنا نفرحكم ونجيبلكم البطولة ولكن هى أقدار من الله، المشوار منتهاش بنوعدكم نفرحكم واللى جاى يكون أحسن، أشكر لاعبى منتخب مصر".