بعد تقديمها لمشروع قانون.. برلمانية: يجب إعادة تدوير الطعام والتبرع به بدلا من هدره
السبت 02/أبريل/2022 - 07:28 م
نشرت عضو مجلس النواب، أميرة صابر، على صفحتها الرسمية بموقع التواصل الاجتماعي "فيسبوك" منشورا عن ما يتم هدره من طعام في شهر رمضان المبارك، بسبب كميات الطعام التي تصنعها الأسر خلال أيامه.
قالت النائبة في منشور لها "بعد أقل من ساعة ، هتترص علي الموائد كلها سواء في البيوت أو المطاعم كميات مهولة من الطعام، قدام عيني دلوقتي شريط طويل من المشاهد ، العزومات اللي الأكل الفايض فيها اكتر كتير من اللي اتاكل، الاوبن بوفيه اللي الناس بتغرف منه اطباق بيقع منها الاكل كأن المجاعة بكره، المطاعم اللي بتعدم الأكل علشان سمعتها و البراندنج اللي معتمد علي ان الأكل كله لازم يكون "فريش"، و غيره و غيره و غيره".
وتابعت: "طبعاً مش محتاجة افكر الناس بالأزمة الاقتصادية و الضغط الاجتماعي الكبير اللي اتسببت فيه، لكن من الانسانية والكياسة و العقل و الدين و كل حاجة أن قبل ما أكل يترمي في القمامة نفكر مية مرة إزاي ممكن منوصلش لده من أول الرشادة في الاستهلاك و ان مش لازم ابداً يكون فيه عشروميت صنف ع الصفرة لغاية اعادة التدوير و ان الأكل اللي ميلزمكش مؤكد يلزم غيرك".
وأردفت "الأسبوع اللي فات قدمت للمجلس مشروع قانون لمكافحة هدر الطعام وتشجيع إعادة توزيعه وتدويره والتبرع به، و مضي عليه معايا ٦٠ نائب أخر بشكرهم جميعاً ،لكن طبعاً المشروع هياخد وقت مش قليل في الدورة التشريعية الطويلة، والمشروع بالاساس مستهدف مقدمي خدمات الطعام من بائعي التجزئة حتى أصحاب المطاعم للتبرع بالفائض الصالح للاستهلاك الأدمي واللي كان بينتهي بيه الحال في النفايات دائما".
وأكملت "لكن الحقيقة إن كلنا مسؤولين و كلنا عندنا أدوار نقدر نقوم بيها ناحية نفسنا و اهلنا و بلدنا و حتي الكوكب اللي عايشين عليه لأن هدر الطعام في الصورة الكبيرة متسبب بشكل ما أو بأخر في الاسهام في أزمة هدر الطاقة، الأرقام كتيرة و كلها متسرش في الملف ده، طبقًا لتقديرات الـفاو، هدر الطعام في مصر بيصل سنويًا ل50 كغ للفرد الواحد، وديه الحقيقة نسبة شديدة الخطورة لدولة 32.5 % من سكانها عايشين تحت خط الفقر وبتواجه تحديات ضخمة جداً متعلقة بالأمن الغذائي والجوع وسوء التغذية والسمنة المفرطة".
وقالت عن التكلفة الاقتصادية"فالتكلفة الحقيقة لهدر الطعام مش بس إقتصادية، الكلفة الاصعب هي الكلفة الإجتماعية والبيئية، في الظروف الصعبة جداً اللي كلنا بنعيشها أنماط الاستهلاك الفردي ليها تأثير مباشر في التخفيف من حدة الأزمة سواء علينا شخصياً أو علي غيرنا من الاشخاص الأكثر حاجة".
وكانت قد تقدمت النائبة أميرة صابر، عضو مجلس النواب، وأمين سر لجنة العلاقات الخارجية بالمجلس، بمشروع قانون لتنظيم مكافحة هدر الطعام، وتشجيع إعادة توزيعه وتدويره والتبرع به.
وذكرت عضوة مجلس النواب مجلس النواب، أن منظمة منظمة (الفاو) تكلفة هدر الطعام الإجمالية عالميًا بـ ٢.٦ تريليونات دولار سنويًا، وتبلغ نسبة الهدر في مصر ٥٠ كيلو جرام للفرد الواحد، وهي نسبة كبيرة بالمقارنة بنسبة الفقر والتحديات التي تواجهها مصر والمتعلقة بالأمن الغذائي والمائي، سوء التغذية، والسمنة المفرطة.
وأكدت عضوة مجلس النواب، في المذكرة الإيضاحية لمشروع القانون المقدم يستهدف المساهمة في إنشاء برنامج قومي لمكافحة هدر الطعام تشرف عليه الهيئة القومية لسلامة الغذاء، ووزارة التضامن بالشراكة مع المجتمع المدني، والنظر والاستفادة من عدد من التجارب الدولية في هذا الشأن ومن أبرزهم تجارب فرنسا وإيطاليا وعدد من دول الاتحاد الأوروبي والصين.
