"انا كنت بموت وربنا نجاني".. نشوى مصطفى بعد تعافيها من فيروس كورونا:"بشكر ربنا اني عايشة في مصر في البلد اللي المواطن عندها أول حاجة" (فيديو)

وصرحت نشوى مصطفى من خلال فيديو تداولته وزارة الصحة والإسكان، قائلة:" بشكر ربنا اني عايشة في مصر في البلد اللي مواطن اول حاجة عندها.. ولما اتصلت بـ 105 سألوني رقمك القومي كام وعملتي ماسحة واتأكدتي عندك كورونا ولا لا .. ربع ساعة وهنكلمك ونقولك تتوجهي فين".

وتابعت:" مسألوش انا وظيفتي ايه ولا سألوا اي سؤال غير عن رقمي القومي.. وسني وانا عندي كورونا ولا لا..انا وصلت بعد 8 أيام عذاب مع الكورونا ووشي كله كان أزرق".

وأشادت بجهود وزارة الصحة، قائلة:" بشكر السيدة العظيمة وزيرة الصحة دكتورة هالة زايد بشكرك للي حضرتك تحملتيه من ساعة تواليكي الوزارة انتي كما الرجال وأكتر انتي عاشقة لبلدك.. انا كنت في مستشفى حكومية والناس كلها بتتعامل معايا علي اساس اني تحدي واني حرب بيحاربوا عدو مش شايفينه".

واستطردت حديثها قائلة:" مش انا بس في ناس كتير اوي هنا في العزل بيتعاملوا معاهم بنفس الدقة وناس سبقوني وخرجوا ودا اداني أمل.. ربنا يكرم كل الدكاترة المصريين وكل ساعتين في دكتور بنفسه يجي يتابع الحالة.. انا كنت بموت وربنا نجاني".

واستكملت:" بشكر وزيرة الصحة وبشكر بلدي انها عالجتني بالمجان دون أي مقابل وبشكر كل القيادات القائمين على خدمة المواطن المصري .. بشكر مستشفيات العزل لانهم عايشين جوه الوباء وكلهم عايشين في حالة من التحدي.. انا كنت داخلة معنديش أكسجين في جسمي انا داخلة مختنقة مش عارفة اتكلم ولا اتنفس ولا انطق .. بشكر كل الجنود اللي هنا اللي نقلوني من الموت للحياة بعد فضل ربنا". 

وكتبت نشوى عبر حسابها الرسمي "فيس بوك"معلقة :" لله الحمد والشكر لله الحمد والشكر  لله الحمد والشكر —  من الموت للحياة  —  بفضل الله ودعوات حضراتكم والله  —  وبفضل وزارة الصحة المصرية ومستشفى الحكومية واطباء وممرضين وحكيمات  المستشفى الحكومة —   خمس دقايق وحاكون لايف مع حضراتكم    من المستشفى".