ضحية لقمة العيش.. تفاصيل وفاة شخص داخل بئر في الإسكندرية.. وشقيقة:"مش لاقين جثته بقالنا 4 شهور" (فيديو)

تحصل وليد سليمان بدر سليمان، وهو أحد النجارين بمحافظة الإسكندرية، على فرصة عمل لتزيد دخله، وهي حفر بئر مياه في إحدى المزارع على طريق "مصر- الإسكندرية الصحراوي"، وأثناء قيامه بأعمال الحفر سقط في البئر منذ 4 أشهر، ولم يتم إخراجه حتى هذه اللحظة.

وروى شقيق المتوفي تفاصيل الواقعة في لقائه مع "مصر تايمز" خلال البث المباشر: " يوم 6 يناير الماضي، اتصلوا بينا من قسم شرطة الشيخ زايد ثانٍ، وبلغونا إن أخويا مصاب، اتوجهنا أنا وأخويا الصغير على القاهرة وروحنا القسم علشان نشوف أخويا، دخلنا للضابط حاول إنه مايصدمناش في الأول، وبهدوء كدة قالنا البقاء لله أخوكوا مات، قولتله حصل ايه؟، قالي أخوكوا اتردم عليه بير والدفاع المدني بيحاول يطلعه، وقالولنا في القسم تعالوا بكرة النيابة عشان نشوف الوضع إيه، دخلنا لوكيل النيابة عشان استدعاني للتحقيق، فقولتله يافندم مش المفروض أخويا يطلع؟ قالي الدفاع المدني حاول يطلعه وكتب تقرير إنه معرفش يطلعه، قولتله طب هنطلعه إزاي؟ قالي أنا هطلب لجنة هندسية تقولهم طريقة استخراجه".

وناشد محمد سليمان، شقيق المتوفي، المسؤولين بمساعدته في استخراج الجثمان وشهادة الوفاة: " أنا عايز أعرف سبب الوفاة، وأخويا يطلع من البير ونستخرجله شهادة الوفاة لإننا لحد دلوقتي مش عارفين نطلعله الشهادة، وولاده في المدارس ومحتاجين يصرفوا، والولاد محتاجين معاشه ومحتاجين إثبات وفاته علشان مصاريف المدرسة تتخفض، وأنا معايا الورق من مديرية أمن الجيزة اللي بيثبت إن الدفاع المدني مقدم تقرير، كل اللي عايزه إن المسؤولين يوجهوا باستخراج جثة أخويا، عشان القضاء يقدر يشوف شغله، عشان مفيش قضية من غير جثمان".