"شبه المجمعات الاستهلاكية".. مسئول أمني يهاجم البنك الأهلى والتزاحم أمام فروعه

كشف اللواء عبدالحميد خيرت، نائب رئيس مباحث أمن الدولة الأسبق، عن أحد المواقف التي تعرض لها، أثناء قيامه بإجراء معاملة بنكية بالبنك الأهلي، مستنكرًا الزحام الموجود بالفرع، حيث وصفه بأنه يشبه "المجمعات الاستهلاكية".

جاء ذلك في منشور عبر الحساب الشخصي له، بموقع التواصل الإجتماعي "فيس بوك" حيث قال: "روحت البنك الأهلي باحد فروع التجمع الخامس، وكان عليه زحمة وناس قاعده بره على مقاعد مجهزها البنك لراحة الجمهور، وإن كانت لا تتعدى 9 مقاعد، لكن باقي الناس واقفين بصورة تفكرني زمان لما كنا نتجمع على فراخ الجمعية في المجمعات الاستهلاكيه، طبعا عملية شاقة أنك تدخل البنك، لكن بعد أكثر من ساعتين تمكنت من الدخول، وما خبيش عليكوا كان موود الواحد مش حلو، والواحد غضبان من جواه، ولقيت أن الناس جوه البنك كتير بصورة ملفتة للنظر، ولقيت نفسي بالمنظر ده، قدامي على الأقل ساعتين كمان، وإن السماح بدخول الناس ليس إلا تهدئه المواطنيين اللي بره .

وأضاف: "الحاجة اللي استفزتني إن لقيت عدد شبابيك السحب والإيداع ثماني شباك، والبنك مشغل شباكين بس، وكل مواطن بيقف قدام الشباك على الأقل عشر دقائق، بصيت على الناس اللي بره والناس اللي جوه و شباكين "الخزنة"، والعطلة اللي أحنا فيها، وعدم أحترام أدميتنا من الأخر قلة قيمة، علشان البنك مشغل شباكين بس من التمانية".

كما تابع منشوره: "لقيت واحد في وسط الصالة لابس بدلة وحاطط ايده ورا ضهره وعمال يبص يمين وشمال، فهمت انه موظف في البنك بيراقب الجو وحركه الناس داخل البنك ماشية أزاي، المهم دخلت عليه وسألته هو ليه أنتوا مشغلين شباكين بس من التماني شبابيك، قالي لكل بنك قوام وظيفي محكوم به، قلتله يعني رئيس الوزراء لو كلم رئيس البنك المركزي علشان يعين بنت أخته حا يقله أسف علشان القوام الوظيفي، يا راجل عيب تقول الكلام ده، وكمان لو أخدت بكلامك كان المفروض تعملوا شباكين بس مش تمانية، قالي لو سمحت انا مش فاضي أتكلم في المواضيع دي، وعندي شغل، قلته مش فاضي ازاي وراك ايه، دا أنت بقالك نص ساعة في مكانك ما تحركتش، هي دي شغلتك اللي بتاخد عليها مرتب، قالي بقولك ايه يا استاذ بصراحة ومن الآخر مفيش موظفين، واحنا كنا بنداري العجز ده بموضوع الكورونا، واتكلمنا في الموضوع ده كتير، لكن القرار في النهايه للإدارة".

واستطرد معلقًا: "بصراحة سكت ولقيت إن استمرار الحوار حايسبب للراجل وجع دماغ هو في غنى عنه، ثم أردف: "لكن انا عايز أقول ينفع الكلام ده في أكبر بنوك مصر، اللي فروعه على مستوى العالم، يكون تعامله مع عملائه بهذا السوء وعدم التقدير.