"ضحاياه إعلاميين وصحفيين".. ظهور مستريح جديد في إمبابة جمع 100 مليون جنيه

وظهر مستريح جديد في منطقة إمبابة بمحافظة الجيزة يدعى " م.س.ت.أ"، وأخيه " ع.س.ت.أ"، وروى بعض من ضحاياه تفاصيل الإستيلاء على أموالهم حيث قالوا أنهما قاما بإيهامهم باستثمار الأموال في شراء سيارات نقل الركاب، وبالفعل قاموا بشراء بعض السيارات، ولكنهم جمعوا أموال الضحايا التي وصلت إلى 100 مليون جنيه وفروا بها هاربين، وتم القبض على أحد الأخوة، والآخر مازال هارب وتستمر الأجهزة الأمنية في بذل جهودها للبحث عنه.

وقال بعض الضحايا أن هناك مجموعة من الإعلاميين والصحفيين باتوا ضحايا لـ "مستريح الأوتوبيسات": "احنا عرفناهم من خلال أصدقائنا وجيراننا في المنطقة، واتطمنا أكتر لما لقينا بعض الصحفيين والإعلاميين بيستثمروا فلوسهم معاه، وهو قالنا إنه بيشتري عربيات نقل ركاب وبنستثمر فيها، وأغرانا بالعائد المادي الكبير اللي هنحصل عليه 5%، وكان جايب كميات أوتوبيسات كتيرة جدا، وعلشان يطمننا اكتر قالنا وقت ما تحتاجوا فلوسكم هتاخدوها، ودخلنا من مدخل انه عايز يفيد أهل منطقته ويساعدهم، واحنا صدقناه واستثمرنا فلوسنا معاه، وبعد حوالي 3 شهور اختفى وقفل كل شركاته اللي في الجيزة وباقي المحافظات".

وعن محاولاتهم في الوصول إليه لاسترداد أموالهم قالوا: " لما عرفنا إنه نصاب ولقيناه قفل كل شركاته وقفل تليفوناته، اتجمعنا كلنا وروحنا مسقط رأسه كفرالشيخ، ولما اتكلمنا مع أهله اتعدوا علينا بالضرب ومشونا، وإحنا كنا عارفين إن في تاجر سيارات كبيرة في كفرالشيخ بيدعمه فروحنا للتاجر ده واتكلمنا معاه وحاولنا نطلع منه بأي معلومة تخص المستريح بس مقالش على أي حاجة، وحاولنا نروح كل الأماكن اللي بيكون متواجد فيها باستمرار لكنه هرب ومقدرناش نوصله".

وأضافوا: " اتقبض على واحد ولسة الأجهزة الأمنية بتدور على التاني، وأخوه قال في التحقيقات إنهم كاتبين كل ممتلكاتهم لأسرتهم علشان لو اتقبض عليهم فلوسهم ماتتصادرش".