لارا إسكندر : لما اتعرض عليها كيرة والجن ماكنتش مصدقة و قولت مينفعش حد يقول لا
قالت المطربة والممثلة لارا إسكندر انا لغاية دلوقتي لسه مش مصدقة إني شاركت في فيلم "كيرة والجن". لما كلموني عشان أعمل تجربة أداء أمام مروان حامد، قولت ما ينفعش حد يقول "لأ" لحاجة زي دي، وبعتبر نفسي محظوظة جدا إني قدمت الدور ده، جاء ذلك خلال مداخلة هاتفية لبرنامج "بحب السيما" الذي يذاع علي ميجا اف ام والبرنامج من تقديم شريف نور الدين.
وتابعت لارا اسكندر ،" فيلم "كيرة والجن" جاني قبل مسلسل "الثمانية"، والغريبة إني عرفت وقتها إني "حامل"، والفريق كله اتخض، لكن بعدها بأسبوع ظهرت جائحة كورونا، وتوقف فيها الشغل وربنا ستر وعدت على خير، بعدها بفترة جاني المسلسل.
وتابعت “ تعلمت من كل فريق العمل، وسعيدة إني مثلت مع أكبر وأهم نجوم في مصر، وأكبر مخرج وكاتب، وكنت محظوظة إني اشتغلت معاهم لأنهم فعلا ناس محترفة، بخلاف إنهم رائعين في التعامل، مضيفه قائلة،"لما شوفت فيلم "كيرة والجن" في العرض الخاص، كنت متأثرة جدا وكنت بعيط مع الناس، صحيح أنا عارفة السيناريو، ولكن هنا براعة مروان حامد إنه خلاني بشوف الفيلم زي المشاهد بالظبط".
واختتمت قائلة الاجابة علي سؤال هكمل تمثيل أو لأ، أنا مؤمنة بالفن ككل، وحبيت التمثيل جدا، صحيح كان صعب أنفذ المسلسل والفيلم سوا، ولسه مش عارفة اللي جاي فيه إيه، لكن أنا مؤمنة إن كل حاجة في وقتها، ومبسوطة برد الفعل عن دوري في الفيلم والمسلسل.
