نجل إبراهيم يسري يكشف عن مكالمة غير متوقعة من نجم كبير خلال فترة مرضه
كشف الفنان محمد إبراهيم يسري عن مكالمة تلقاها خلال فترة مرضه وأسعدته كثيرا لأنه لم يتوقعها.
وقال محمد إبراهيم يسري في تصريحات تليفزيونية، “من المكالمات اللي كانت بالنسبة ليا فارقة معايا أوي لأنها مكالمة حقيقية أوي كانت من النجم الكبير أمير كرارة، أحنا عمرنا ما أتقابلنا ومشتغلناش مع بعض، وهو وصل لنمرتي وقعدنا نتلكم نص ساعة أو أكتر”.
وطمأن الفنان الشاب محمد يسري نجل الراحل إبراهيم يسري، جمهوره على حالته الصحية بعد تعرضه لجلطة في القلب مؤخرا، وخضع لعملية قسطرة وتركيب دعامة في القلب.
وقال محمد يسري، في فيديو نشره عبر حسابه الشخصي بموقع انستجرام: "أنا مبسوط إني بعمل الفيديو ده بالذات بعد التجربة اللي عديت بيها، والحمد لله إني قادر أطمن الناس، أنا تعرضت من أسبوع فجر يوم الأحد لوعكة صحية، حسيت بوجع شديد جدًا في صدري، وضغطي وطي جدًا وجسمي كان متلج، مكنتش أعرف ده إيه وكنت متخيل إنه حاجة وهتعدي، خاصة إن مفيش سبب إن ده يحصل".
وتابع نجل إبراهيم يسري : قعدت شوية في البيت لأني للأسف مش شخص ممكن يروح المستشفى طواعية، ودي طبعًا كارثة، وبعد شوية ربنا ألهمني إني لازم أتحرك، وروحت المستشفى، الناس استقبلتني على طول، وكانوا متخيلين إن الدنيا تمام لأني دخلتلهم على رجلي، لكن بعد ما بدأنا نعمل فحوصات طلع عندي جلطة في الشريان الأمامي في القلب، والجلطة دي عملت شبه انسداد كامل في الشريان، فالدم مش داخل بسهولة، فاضطريت في ساعتها إني أعمل قسطرة وأركب دعامة في القلب، واتحجزت يومين في العناية المركزة، وبعدها يومين في غرفة عادية، وخرجت الحمد لله، قدر ولطف.
وأصيب الفنان الشاب محمد إبراهيم يسري، نجل الفنان الراحل إبراهيم يسري بجلطة في القلب.
