آسر ياسين يرثي مساعده الخاص بكلمات مؤثرة
وجه الفنان آسر ياسين كلمات رثاء إلى مساعده الشخصي مجدي الذي رحل عن عالمنا من ثلاث أسابيع.
وكتب آسر ياسين: "إهداء لمجدي، كان المساعد بتاعي لأكتر من 14 سنة، قصته فيها كمية عِبر حياتية غير طبيعية، اشتغل كهربائي لمدة تلاتين سنة وبعد كده حصلتله حادثة موت اتكتبله فيها عمر جديد".
وتابع آسر ياسين: "من هنا ابتدا يشتغل مساعد ليا بناءًا على نصيحة أبويا اللي رشحهولي عشان إخلاصه وأمانته.. عمره ما كان يتخيل إنه يشتغل في السيما ويقابل روبي ومني زكي ومحمود حميدة، ومش بس كده، ده كمان وقف قدام الكاميرا كذا مرة في أدوار شرفية كل الناس حبته لأنه يخش القلب علطول لطيبته وبساطته".
واستكمل: "كان يخاف عليا جداً بالذات في مشاهد الأكشن، وكنا ساعات بنتقمص من بعض لما نخش في حوارات عبثية عن الحياة وبعدها نقوم مهيفيين بأي كلام زي الصورة اللي في البوست، واللذيذ في الموضوع إنه كان ييجي يسألني عن نصيحتي في حاجات شخصية على رغم فرق السن".
وأضاف: "مفيش طفل يشوفه غير ولازم يبتسم لا إرادياً بسبب وشه البشوش والطفولي.. مجدي رحل عن عالمنا من 3 أسابيع ، ولحد النهاردة أنا ما اتكلمتش عنه. يمكن لأني بتجنب ده أو أني معتبره ماحصلش، مش عارف.. بس اللي عارفه كويس أوي أنه حقيقي واحشني".
يذكر أن آخر أعمال آسر ياسين كان مشاركته بمسلسل سوتس بالعربي الذي تم عرضه في الموسم الرمضاني لعام 2022.
