دعاء فاروق : مفيش ست تدخل تلاقي جوزها بيتهزأ عندي فتزعل
أعربت الإعلامية دعاء فاروق، عن استيائها الشديد من ردود أفعال غير لائقة على منشوراتها، التي تنشرها مع أصدقائها عبر صفحاتها على مواقع التواصل الإجتماعي، مشيرة إلى أنها ستلجأ إلى البلوك والتجاوز.
دعاء فاروق : مفيش ست تدخل تلاقي جوزها بيتهزأ عندي فتزعل
وكتبت دعاء فاروق، عبر حسابها الشخصي بموقع التواصل الاجتماعي" فيسبوك" قائلة: " عشان نبقي على نور يا جماعة ومفيش ست تدخل تلاقي جوزها بيتهزأ عندي فتزعل.. أي راجل هيدخل يعلق بطريقة غير لائقة ويمصمص لي شفايفه على أي صور لصديقاتي أو أخواتي أو صوري أو شكلي الراجل اللي هيفتحها ويبص عليها ويبدأ يلت ويعجن وينظر على شكل أو حجاب أو لبس هيتهزأ قدام أمة لا إله إلا الله".
وتابعت دعاء فاروق:" ملكش حكم غير على أهل بيتك وممنوع تدخل تنطق بحرف لا حلو ولا وحش في الحالتين بعمل بلوك.. اللي بيتغزل أو بيقول كلام مايع بيتهزأ ويتعمله بلوك زيه زي اللي بينظر ويدخل يحاسبني إني بتاعت البرامج الدينية ويقعد ينظر على شكل أي حد ويخرجنا من منظومة الأخلاق والدين اللي محاوطاه ومحاوطة أهله فقط، الاتنين هيتهزأوا ويتعملهم بلوك".
وواصلت:" مفيش رجالة محترمة تدخل تبص وتتكلم على شكل أي ست عندى على صفحتي مهما حطيت من صور كلهم زملاء وسيدات محترمات لابسة إيه أو شكلها إيه، ده مش موضوعك عشان كرامتك مش هتعرف تلمها.. أنا بتناقش مع الستات وبحاول أوصل وجهة نظري معاهم في بعض المواضيع إنما مش بتناقش مع رجالة".
وأردفت دعاء فاروق:" الراجل اللي هيدخل يقول كلمة مش مظبوطة هشوطه أنا مش بتملق حد ولا يفرق معايا مخلوق تحاسب نفسك الأول على حياتك ونواقصك قبل ما تدخلوا تحاسبوا الناس على حاجة مش من حقكم.. اللهم بلغت".
