سابوا راجل مسن فى الشارع لحد الفطار.. شاب يحذر من التعامل مع أوبر
حذر شاب من التعامل مع شركة أوبر ، بعدما ترك سائقي الشركة رجل مسن وقت أذان المغرب دون اعتذار وقاموا بإلغاء الرحلة أكثر من مرة.
وقال صاحب المشكلة مع أوبر،" انا والدتي متوفية ووالدي قاعد لوحده، وكان ناوي يقعد أول اسبوع من رمضان عند أخويا الأكبر مني بس أنا اقنعت والدي إنه يقعد عندي أنا أول إسبوع... أنا ساكن في الخصوص وطبعا شغال ومينفعش اسيب شغلي خاصة اليومين دول وكنت متفق مع والدي إن هروح الزاوية أجيبة بعد الشغل على الساعة ٤... فوجئت إن مفيش مواصلات خالص في الوقت ده وكان ميعاد الفطار قرب قولت هطلبله أوبر وهتابع الرحلة وانتظره عند بيتي".
وتابع عن مشكلته مع شركة أوبر ،" والدي راجل كبير وبينزل السلم بالعافية، طلبتله أوبر وخليته ينزل وينتظر في الشارع...الكابتن فضل كتير في طريقه لبيت والدي وكان بيقف مش بيتحرك كلمته شات بيقولي الطريق زحمة رغم إنه كان بينه وبين البين حوالي 3 دقائق..عشر دقائق ولغى الرحلة، طبعا مش فاضي ابعت شكوى دلوقتي ووالدي واقف في الشارع والمغرب قرب...طلبت رحلة تانية وتقريبا نفس السيناريو ولغي بعد 9 دقائق...
رحلة 3 نفس الكلام الرابعة كان المغرب فاضل عليه عشر دقائق وأنا واقف على الدائري مفيش عربيات، وكابتن الرحلة الرابعة استلم الأوردر وفضل واقف في مكانه مش بيتحرك واتصل بيه مش بيرد لغاية ما اتنرفزت عليه ولغيت أنا الرحلةوالمغرب أذن عليا ووالدي وأنا في الشارع".
وقال عن مشكلة سائقي أوبر ،" السؤال هنا فين الإحترافية بتاعة الشركة ديه أول ما بدأت؟ وليه السواقين (وأنا آسف للسواقين لأن السواقين اكثر احتراما منهم) بيستلموا الأوردر طالما مش هيطلعه...وليه التحايل ويمشي بعربيته شوية ويقف شوية قبل ما يوصل نقطة الإلتقاط لحد ما العميل يزهق ويلغي هو...أنا ليا حق عن أوبر واقسم بالله مش هسيبه علشان وقفة والدي في الشارع وقت الفطار وخصوصا إنه مكانش عامل حسابه على فطار علشان جاي يفطر عندي".
