سيدة تحذر من التعامل مع خطوط الطيران السعودية

حذرت سيدة من التعامل مع خطوط الطيران السعودية بعد تجربتها التي وصفتها بإنها الأسوأ على الإطلاق.

وقالت السيدة عن خطوط الطيران السعودية،" الطيران السعودي التجربه الأشد مرارة و الأحلك سواداً في البدايه أحب اقول ان انا فى منتصف الستينات الحمد لله و كان نفسى اطلع عمرة رمضان و فعلاً ابني كان معاة فيزا شينجن و عن طريقها اقدر أقدم .. و فعلاً حجزنا يوم ٣٠/٣ ذهاب و ٤/٧ على الخطوط السعودية بس للأسف ترانزيت لأن الوقت دة مفيش حجز مباشر .. سافرت يوم ٣٠/٣ و كان ترانزيت الرياض و كان زحمة جداً و شبه فوضي فى الصالة .. و بلغنا الأمن ان احنا معانا شينجن و محتاجين نعمل تأشيرة الوصول لانها بتاخد وقت قالنا اقفوا مع الناس .. و عقبال لما الدور جيه علينا كان ناقص تقريباً تلت ساعه و الطيارة تطلع و البنت اللى بتطلع التأشيرة قالت المفروض كنتوا تيجوا بدرى عن كدة حكينا قصه الامن معانا .. المهم خلصت التأشيره فى حوالي نص ساعة او ساعة الا ربع كانت الطيارة طلعت !!".

وتابعت عن خطوط الطيران السعودي،" و قعدنا نحكي القصة دى للموظفين فى المطار و نطلع اي طيارة و مفيش فايدة و الكلام دة من الساعه 9 بليل للساعة 3 الفجر لحد في الاخر الموظف للأسف بتاع علاقة الضيافه بكل عنجهية قال مشوا من هنا و روحوا احجزوا تذكرة جديدة قعدنا نقول مش ذنبنا و مفيش فايدة .. ابني راح سأل قالوله التذكرة الواحدة هتتكلف 980ريال !! حسبي الله قولنا لأ كتير الحقيقه قولنا خلاص هنحجز باص من الرياض لجدة علشان ناخد الشنط من المطار وكان اول باص الساعة 8 الاربع يعني هنقعد حوالي 5 ساعات تاني و تكلفته لينا احنا الاتنين بالتاكسي حوالي 600 ريال و قعدنا فى الباص حوالي 12 ساعة دخلنا الفندق تقريباً الساعة ١ يعني تقريباً يوم راح".

وأوضحت صاحبة المشكلة عن الطيران السعودي،"  قوة الشركات او تطورها بيظهر فى الازمات و حل المشاكل سواء من مرونه الشركة او الموظفين و دة للأسف محصلش وبان اد اية فيه فشل يوم ٤/٧ روحنا المطار علشان نرجع القاهرة و احنا فى ال boarding لقيتهم بيقولوا التذكرة بتاعتكوا closed بسبب انكوا ما أخدتوش الطيارة اللى جاية من الرياض لجدة قولنا اية العلاقة و محتاجين تتكلموا مع المبيعات علشان تقدروا تسافروا و قعد ابني يتكلم معاة و كان الاختصار اننا لازم ندفع فرق تغيير الطيارة حوالي 200 ريال لكل شخص ودة النظام !!! يا أما مش هتقدروا تسافروا !! بلطجة و تحكم بدون رقيب و للأسف مفيش حل تاني غير اننا فعلاً دفعنا.

وقالت ،" الخلاصة ان دى كانت أسوأ و ابشع تجربة حصلت و أتمني الناس تاخد بالها من الطيران دة !! حسبي الله و نعم الوكيل فيهم".