حرامية.. تحذيرات من سائقي "أوبر" بعد سرقة متعلقات عملاء أثناء توصيلها من مكان لآخر
حذر مواطن من التعامل مع شركة أوبر والتعامل مع سائقيها وذلك بعد تعرضه للسرقة من سائق أوبر ، وقال صاحب المشكلة ،" عندي مشكله سرقه من سائق في Uber و اوبر لم تقوم بالمساعده المطلوبة.. يوم الجمعه 21/4/2023 طلبت خدمه اوبر (توصيل Package) من الحي العاشر إلي التجمع الخامس و السائق اخذ الحاجات و بعد ما بدأ الرحله ب ٥ دقايق قفل الرحله و خلع. طبعا معيش اي رقم اكلمه عليه. معنديش غير اسمه و صورته و رقم الموتوسيكل زي ما موضح في الصور".
وتابع عن مشكلته مع شركة أوبر ،" طبعا اول حاجه عملتها قدمت شكوي ل اوبر عشان يساعدوني ارجع الحاجه و عندهم بينات السائق. كان ردهم عليها هنتخذ الاجراءت و طلبو موافقه مني يشاركو رقم تلفوني مع السائق و تمام وافقت بس قولتلهم هو سارق هيكلمني يرجع الحاجه اذاي؟ كان ردهم نفس السؤال ممكن نشارك رقمك للسائق؟... قولت ماشي مفيش مشكله و محدش تابع معايا بعتلهم تاني يوم .. قالولي تم مشاركه السائق رقمك و هيتواصل ينسق معايا. استغربت هيكلمني يرجع الحاجات و هو اخذها اذاي !! ف قوتلهم ممكن تشاركوني رقم تلفونه / رخصه القياده / بطاقه .. لم يتم الرد عليا و يقفلوا الشات ".
وتابع عن مشكلته مع شركة أبور ،" رحت عملت محضر في القسم و المشكله ان رقم الموتوسيكل الموجود علي ابلكيشن اوبر لم يتم العثور عليه من قبل المرور ف طبعا في مشكله كمان مع اوبر داخليًا "عشان حاجه ذي دي تحصل مفيش اي رقم اكلم عليه اوبر عشان مش موجود؟ الكارثه الاكبر ان معني كده ارقام العربيات او الموتوسيكل ممكن تكون مش حقيقه ف ممكن يخطف حد!!… انا مش عارف اوصل لحل ف لو حد عنده فكره ياريت يقويلي اعمل ايه؟ و خلي بالكو قبل ما تركب العربيه من شكلٍ السائق و العربيه و الارقام تكون ذي الابليكشن".
وتابع مواطن أخر عن مشكلة تعرض لها مع شركة أوبر ،" عاوز احكي عن اخر تجربة ليا مع Uber يوم 23 ابريل الساعة 3 الفجر طلبت رحلة من مصطفى النحاس الحي الثامن ل الحي السابع و كان معايا واحد صاحبي, العربية وصلت و الراجل قاللي انه هيوصل حاجه في طريقنا و مش هنتأخر فا قولتله عادي مفيش مشكلة, اللي عرفته يعني انه كان بيوصل اصلا اوردر تاني باكدج على ابليكيشن تاني لعميلة تانيه يعني, المهم بعد كده قعد يلف بينا و دخل عباس و قعد يلف في شوارع جانبية و احنا طريقنا اصلا مصطفى النحاس علطول".
وقال"لما وصل كان في بنت مستنياه فا نزلها وكانوا واقفين ورا العربية و لما استلمت حاجتها و بتحاسبه قالها الحساب 250 و هي قالتله الحساب عندها كان 140 بس عشان هو قعد يلف كتير في الحساب زاد طبعا, المهم فضلوا حوالي 20 دقيقة على كده بيشدوا مع بعض لدرجة ان ابليكيشن Uber بعتلي رسالة عشان مابنتحركش بقالنا كتير بيقولي “are you okay?” لحد ما والدتها جت و بعد كده انا نزلتله استعجله فا لما نزلتله البنت قالتلي هو ازاي انا طالبه اوردر و انتوا راكبين معاه فا قولتلها اني طالب اوبر و هي طلعت طالبة ديدي و هو شغال عالاوردرين في نفس الوقت, بعد كده هي قالتله طب خد الفلوس و حسبي الله و نعم الوكيل فيك فا هو قالها انتي انسانة قذرة و بص لوالدتها و قاللها و انتي ماعرفتيش تربّي, فا بقوله احترم نفسك ماينفعش تكلمهم كده فا شدني من الجاكت بتاعي و قالي انت بتحلوّ طب انا هوريك هعمل فيك ايه و فضل ماسكني و بيشدني فا اتخانقنا و ضربنا بعض بعد ما اتعدى عليا الاول و قعد يقولي انا هبيتك في القسم و كلم حد قاله ابعتلي عربية من القسم عشان في واحد "شتيمة بالأم" عايز ابيته في الحجز النهاردة و بعد كده قالي ولا اقولك انا مش هبيتك في الحجز انا هخطفك و هوريك انا هعمل فيك ايه".
وقال عن مشكلته مع أوبر ،" و لو انت راجل خليك واقف هنا و هوريك هعمل فيك ايه و طلع موبايله و صورني و قالي انا همشي دلوقتي بس هعرف اجيبك واخطفك..بعد كده قدمت شكوى على الابليكيشن و كتبت فيها اللي حصل, صحيت تاني يوم الصبح لقيت Uber قافلينلي الابليكيشن و عملت شكوى تاني ان ليه الاكونت مقفول قالولي حد هيكلمك و محدش كلمني لدلوقتي, فا انا دلوقتي ولا خدت حقي ولا عارف ازاي حاجه زي كده تحصل و يكون في كمية عدم الاهتمام ديه منهم. بجد Uberوصلوا لمستوى متدني جدا الفترة الاخيرة و اي تجربة معاعهم بقت حاجه متعبة, اللي هو انت بتطلب عربية و تدفع زيادة مقابل راحتك المفروض عشان تلاقي واحد يقولك انا هخطفك!!!".
