شاب يحذر من "سبوبة" شركات العمالة المصرية بالخارج ويوثق تجربته فى الإمارات
وثق شاب تجربته مع شركة عمالة مصرية لإلحاق العمالة فى الخارج، بعد أن وقع فريسة لإحدي الشركات فى المحلة الكبري، ساردا تجربته التي عاشها فى الإمارات.
شاب يحذر من "سبوبة" شركات العمالة المصرية بالخارج ويوثق تجربته فى الإمارات
وقال الشاب" عايز احكي عن تجربه مع شركة الموسي في المحله الكبري لإلحاق العماله بالخارج ، الشركه دي كانت عامله إعلان عايزين ناس لعقد امن في الامارات يكون معاهم لغه انجليزي ممتازه والطول اعلي من 175 سم وشوية شروط كده اتضح فيما بعد انه اصلاً مفيش اي حاجه فيها مهمه بالمره ، المهم الاول قالوا هنطلع ابو ظبي علي راتب 2770 وبعدين استنيت شهر كامل وبعدين لاقيت اتصال منهم انه الراتب هيبقي 2260 والشغل في دبي قلت مش مشكله الواحد كده كده محتاج شغل نطلع ونتوكل علي الله وطبعاً قايلين احلي كلام علي الشركه والسكن والدنيا هناك ملهاش حل وانه شركة سبارك للخدمات الامنيه دي من افضل الشركات ، المهم روحت وطبعاً قعدت فتره كده كبيره لغاية ما نزلت الشغل وبما انك عربي فبتنزل اسواء المواقع في الشركه الا لو حظك حلو بقي".
وتابع " المهم داومت كام يوم وبعدين وقفت لانه الاداره اتصلت بيا قالو لازم تاخد دورة السيرا الامنيه والدوره دي خدت ٤ ايام فكان اعتقادي انه طالما انت طالع لحاجه تبع الشركه فهي محسوبه اتضح انه الايام دي مخصومه من الراتب وكمان ايام الاجازه في الشهر ده مخصومه فكلمت المصري الوحيد اللي في الاداره تقريباً بسأله لما الراتب نزل فيما بعد قالي انت شغال باليوميه من الاخر راتبك مش ثابت ف انزل اشتغل علي قد ما تقدر عشان تاخد راتبك اللي هو اتضح مفروض يكون 2100 درهم ومخصوم منه ٤٠ درهم مغسله لغسيل اللبس بتاع الشغل وسواء انت اشتركت في المغسله دي او لا ف هما هيتخصمو منك كده فرده ، وطبعاً مخصوم منك كمان 100 درهم شهرياً عشان تاخدهم وانت نازل اجازه راتب اجازه “.
وقال" يعني كده الراتب اصلاً نزل لـ 1900 وشويه او اقل وبرضو معتمد علي عدد ايام دوامك يعني ممكن ميبقوش كاملين وطبعاً كده الراتب اللي انت طالع عليه كل سنه وانت طيب انت مش عارف له راس من رجل، نيجي بقي لنقطة السكن اللي لو حد بيربي كلب مش هيقعده فيه من البق والجرب والصراصير ومفيش اي نضافه حرفياً من جانب الشركه لسكنها وده برضو طبعاً كلام مختلف عن اللي اتقال في مصر لانهم قالوا بالكتير اوي حتي هيبقي 5 او 6 افراد في الاوضه انا كنت قاعد في اوضه فيها 14 واحد بنجاله وهنود وباكستانيين وطبعاً عادات وتقاليد وقلة نضافه ما يعلم بيها الا ربنا سبحانه وتعالي لدرجة اني اتصبت بمرض جلدي من المكان وقلة نضافته ولما طلبت من مسئول السكن هناك تغيير الاوضه لاقيته بيقولي نجيب لك فندق تقعد فيه يعني ولا نعمل لك ايه ، كلمت مسئول هناك من الاداره قالي مينفعش تغير السكن ومسئول السكن بلغنا انه مفيش اوض فاضيه وده طبعاً كدب لانه الاوض الفاضيه والنضيفه للحبايب من الجنسيات التانيه وطبعاً حاولت اتواصل مع جمال الموسي صاحب الشركه ومع السكرتاريه بتاعه علي اساس انهم يتكلموا حتي يحلوا المشكله دي ومفيش اي تفاعل منهم حرفياً “.
واستطرد الشاب" خلاص طالما قبض عالراس وخد فلوسو ف انت روح بقي ربنا معاك ، حاولت اقول لحد في الاداره يا جماعه طيب اي بدل سكن واطلع اسكن بره قالولي انت ماضي انه متوفر لك السكن والمواصلات مفيش بدلات واقعد في الاوضه ، وهرفق لكم منظر المراتب اللي كنت نايم عليها ومتغيرتش الا بشكوي في وزارة الصحه الاماراتيه من ناس كانوا معايا واحد فيهم رفع شكوي وطبعاً المراتب متغيرتش الا بطلوع الروح وكمان صور للحمام والمناشر السوبر لوكس اللي الشركه قبل ما اسافر كانت بتحكي عنها وعن نضافتها وانه المكان راقي وكويس جداً ، طبعاً الواحد مش عارف يحكي حتي عن المشاكل اللي قابلها في الشغل لانه الاداره معينه الناس اللي من نفس الجنسيات زي المخبرين في المواقع يعني النفس اللي بتتنفسه منقول للاداره وممكن يرفعوا فيك تقارير بالكدب عشان يتم الخصم عليك وطبعاً انت ملكش حق الاعتراض"
واختتم تجربته قائلا"الخلاصه انه الشركه دي بتقولك كلام مش بتلاقي منه حرف واحد صح ، وانا بحذر من التعامل معاها وهحط صور تثبت كلامي وكمان صورة شهادة الخبره الامنيه اللي بيعملوها ب 500 جنيه في مصر وبرضو لما وصلت دبي لاقيت المشرف الهندي هناك راح حاططها عالمكتب كده وبيقولي انا عارف انه ولا واحد من اللي جايبن عارفين حاجه عن شغل الامن يعني اتضح برضو انها سبوبه من الشركه لا اكتر ولا اقل والله اعلم واخدين زياده كام كمان في توثيق الشهادات ، دي تجربتي مع الشركه دي وحسبي الله ونعم الوكيل فيهم"
