"طيرهم على الرصيف".. مصرع طبيب ونجلته في حادث سير مروع بمساكن الشيراتون (صور)
لقى طبيب يدعى أشرف الكيلاني، طبيب أنف وأذن، ونجلته "دينا" مصرعهما في حادث سير مروع، بشارع سيد زكريا بمساكن الشيراتون حيث قام المتهمين بالسير بسرعة جنونية بسيارتهم والاصطدام بهما ومن شدة الاصطدام بهم على حسب قول شاهد عيان:"طيرهم من على الأرض وخبطهم في عمود النور وسابهم غارقنين في دمهم".
"طيرهم على الرصيف".. مصرع طبيب ونجلته في حادث سير مروع بمساكن الشيراتون (صور)
وقال شاهدعيان على الحادث:"يا جماعة أنا كنت مع صاحبتي عند النساجون عند بنك QNB وفجأة جات عربية ماشية بسرعة جنونية.. وقامت شايلة ناس ماشية على الأرض طيرتهم حرفيًا لحد عامود النور فوق، ونزلوا تحت عند المحلات.. والعربية اللى خبطتهم اتقلبت نزلت تحت عند المحلات.. لدرجة شبابيك من العمارة وقعت من شدة الخبطة".
وتابعت:"الراجل اللي اتخبط مات والبنت كلها كسور ودم واللي جرالها مش عايزة أقوله من صعوبته، الإسعاف جات بعد نص ساعة.. واللي في العربية طلع ونقلوه المستشفى ومعرفش كانوا كام واحد ملحقتش أشوف لإني كنت مع البنت بحاول أخليها واعية بعد ما لقيت فيها نفس.. ولما الموضوع طول حاولت ألقنها الشهادة للاحتياط.. وفضلنا معاها انا وصاحبتي لحد ما الإسعاف جات وأخدتها".
وأضافت:" الكارثة كانت في كام شخص مفهمتهمش.. واحد داخل يتخانق عايز يتطمن على محله، والبنت حرفيا بينها وبينه متر وغرقانه في دمها.. والشباب اتعصبوا عليه.. والتاني كان واقف يصور البنت وانا وصاحبتي عملنا معاه الصح وخليناه يمسحه! قبل ما نمشي اكتشفوا ان في واحد تاني تحت العربية بس معرفش عايش ولا لأ".
واستكملت:"الناس دلوقتي بتقول ان الراجل اسمه د.أشرف الكيلاني دكتور انف وأذن.. وفي ناس بتقول ان البنت بنته، انا معرفش غير ان اسمها دينا محمد حسب الاسم اللي اتقال لما لقوا البطاقة، البنت في كلام انها اتوفت وكلام انها فقدت رجليها الاتنين وعايشة، انا معنديش تأكيد على حالتها،اخر حاجة شفتها ان كان فيها الروح والإسعاف اخدتها.. الشارع ده كارثي ولازم يتحط في مطبات او إشارات عشان لسة من يومين في دكتور مات برضو كدة".
