هدى هاني تكشف سر علاقتها بسعاد نصر: "كانت أمي فعلا وهي اللي علمتني الصلاة"

كشفت الفنانة هدى هاني عن سر علاقتها الوطيدة بالفنانة الراحلة سعاد نصر، مؤكدة أنها “كانت أمها وهي التي علمتها الصلاة”.

وأضافت هدي هاني: "ليا ذكريات معاها من ايام المسرح كنا ورا الكواليس بنقرأ القران قبل ما نتدخل، كانت امي في الهمجي وأمي في المسلسل، كانت أم فعلا بتخاف علينا متدخلة في خصوصيتنا ومذاكرتنا وادتنا نصائح كتير وتوصيات كتير لسه محافظة عليها لغاية دلوقت وهي اللي علمتني الصلاة.

أضافت هدى هاني خلال تصريحات صحفية: “لما اتجوزت جاتلي البيت وكانت أكتر واحدة ليها صلة بيا بحكم أن عمتي الفنانة هناء الشوربجي”.

كشفت الفنانة هدى هاني، حقيقة احتكار الفنان محمد صبحي لفناني مسلسل “يوميات ونيس”، إذ قالت: “أنا مش هدافع عن أستاذي لأن هو اللي علمني، لكن أكبر دليل أن الاحتكار ده مش حقيقي، أني عملت أكتر من ٢٠ مسلسل وكان ليا كذا محطة نجحت فيهم منهم العطار والسبع بنات، العائلة والناس مع المخرج محمد فاضل، العار مؤخرا”

وعن حديث الفنانة عبير صلاح الدين بشأن احتكار لها، قالت هدى هاني خلال تصريحات صحفية: “مش هتكلم عن عبير صلاح الدين واللي قالته لكن في نجوم كتير وسوبر ستارز كان محمد صبحي اللي حاطط حجر أساسهم واكتشفهم منهم منى زكي، هاني رمزي، مصطفى شعبان أسماء كبيرة وكتيرة”.

تابعت: “المشكلة أننا لما بنرتبط بأستاذ صبحي بيبقي ليه طريقة معينة هو ليه طريقته وبيئته، بيبقي صعب لما تخرجي تتأقلمي مع شكل اخر احنا مش بنبقي عارفين نتأقلم لكن هو عمره ما منع بالعكس أنا لما بيشوفلي عمل بيكلمني وبيقولي برافو عليكي إنما عمره ما قالي ايه اللي انتي عاملاه ده؟ هو مطلع كويس وبيشوف كل واحد فينا بيعمل ايه، لكن بيبقي غيور علينا وزي الأستاذ مع تلميذة مش عايزة يضل الطريق”