مواطن يحذر من سيارات تيجو 3 من توكيل "غبور": عيب فى الفتيس وصلحوه فى 140 يوم
استغاث مواطن من توكيل شركة "غبور" بعد شرائه سيارة واكتشاف مشكلة فى الفتيس الخاص بها ، بجانب مماطلة التوكيل فى حل العيب والمشكلة ، على حد قوله.
وقال صاحب المشكلة عبر السوشيال ميديا ، " انا اشتريت عربية تيجو 3 من توكيل غبور يوم 19 يوليو 2023 .. وعملت صيانة الالف كيلو يوم 30 يوليو 2023 .. كان في مشكلة في حساسية دواسه البنزين و مشكلة في السحب و ظبط الزوايا.. المهندس قالي لا كله كويس و مفيش مشكلة.. ويوم 19 اغسطس بالليل ابتدات تظهر المشكلة الاكبر العربية مش بتستجيب لدواسة البنزين و مش بترجع لوراء".
وتابع صاحب المشكلة مع توكيل غبور،" يوم 20 اغسطس روحت للتوكيل قالولي العربية جابت فتيس ( العربية ماشية 4062 كيلو ) و الصين اعترفت ان ده عيب صناعة خلال 48 ساعة، وعملت شكوي في حماية المستهلك طالبت تبديل العربية و تحمل غبور رسوم الترخيص و التأمين ( 26 الف جنية) نظرا ان العيب ظهر من يوم 30 يوليو (خلال 30 يوم) و تم التملص من التوكيل و قالولي كله كويس و مفيش مشكلة ، ومن يوم 20 اغسطس يتم دراسة المشكلة في جهاز حماية المستهلك و في يوم ٤ اكتوبر ابلغوني بجلسة يوم 10 اكتوبر".
وقال صاحب المشكلة ،" رئيس اللجنه قالي مش هينفع نغير العربية علشان العطل ده ظهر لاول مره في عربيتي و لازم يتكرر ؟! و اللجنه حكمت بتبديل الفتيس علي حساب التوكيل و صيانه مجانيه حتي 30 الف كيلو و مد فترة الضمان سنه ، في محضر الجلسه دي شركة غبور اقرت تسليم العربية في شهر نوفمبر
- عملت تظلم في نفس اليوم علي قرار اللجنة و طالبت بتغيير العربية و احتساب قيمة إيجارية عن كل يوم عطل من يوم 20 اغسطس و حتي استلام السيارة ، وفي شهر نوفمبر توصية اللجنة الفنية باحتساب قيمة إيجارية من يوم العطل و حتي تمام الاصلاح و تم تجاهل طلب تبديل السيارة ".
وواصل ،" في 27 ديسمبر قرار مجلس ادارة الجهاز احتساب قيمة إيجارية من يوم صدور القرار فقط ؟! تم تجاهل طلب تبديل السيارة و تجاهل توصية اللجنه باحتساب القيمة الإيجارية من يوم العطل".
وتسأل صاحب المشكلة قائلا "السادة المسؤلين هل القرار هذا رادع لشركة غبور كي لا تتملص من مسؤليتها و لا تعترف بأخطأها مرة اخري و المهندس يبلغني ان كل حاجة كويسة و مفيش مشكلة ؟ كيف كنت اتنقل انا و اسرتي قبل صدور القرار لمدة 129 يوم ؟ هل 350 جنية القيمة التي تم اقرارها من مجلس الادارة تتناسب مع ارتفاع اسعار إيجار سيارة لكي اقوم بممارسة حياتي الطبيعية و الذهاب الي عملي كي استطيع دفع قسط قرض السيارة ؟! وركنه العربية في التوكيل تعرض الكاوتشات و البطارية الي التلف
وتابع ،" انا دافع تأمين و ترخيص و قرض لسيارة لا استعملها ؟! لماذا القرار من ( يوم صدور القرار فقط ) حيث انني متضرر من يوم ٢٠ اغسطس .. اتعرض لخسائر مادية رهيبة و ضغوطات نفسية و زيادة اعباء بسبب ايجار سيارة بديلة رغم ان المتوقع من شراء سيارة زيرو من التوكيل هو تقليل الاعباء و الراحه النفسية
انا استلمت العربية يوم 6 يناير 2024 بعد 140 يوم تعطيل في التوكيل .. هل من الطبيعي ان تغيير الفتيس ياخد 140 يوم ؟! و هل القرار الصادر يحث شركة غبور علي سرعة التصليح مع العملاء الاخرين ؟!
اخيرا ارجو من حضراتكم اعادة النظر في هذا القرار الذي لا يحميني كمستهلك و للاسف يزيد من الضرر الواقع عليا".
