إبراهيم عبد القادر: صلاح الشرنوبي تجاهلني.. وحابب رسالتي الفنية تكون نضيفة للآخر
أعرب المطرب إبراهيم عبد القادر، عن استيائه بسبب تجاهل أصدقائه الملحنين صلاح الشرنوبي ووليد سعد له، كما أكد أنه ليس نادمًا على دخول المجال الفني.
وقال إبراهيم عبد القادر، في تصريحات تليفزيونية: أنا زعلان جدًا من الملحن وليد سعد، لأني قدمته في أهم أعماله خسارة يا أول حبيب، هو مأنكرش فضلي بشكل صريح ولكن أفعاله بتدل على النكران، ووالده صديقي وحبيبي، وبعد كده هو انطلق وتعاون مع وردة ومحمد منير ونجوم كتير، طب افتكرني في لحن، مش ببلاش يعني، ولكن هو مذكرش خالص أننا تعاونا مع بعض في يوم من الأيام.
وتابع: وأنا زعلان كمان من صلاح الشرنوبي، إحنا بدايتنا كانت مع بعض وهو كان في برنامج بيتكلم عن مشواره الفني وبدء من عند مدحت صالح وتعداني، وأنا واجهته ومبسيبش حقي، بزعل من الحاجات دي.
وأضاف: مبحبش الغلط ومبحبش حد ينشز ورايا من الفرقة الموسيقية، وأنا نفسي أكمل في دوري الاجتماعي والإنساني، ولو رجع بيا الزمن هخوض نفس طريقي في الفن، وعايز تبقى رسالتي الفنية نضيفة للآخر.
