عمرو سلامة: فكرت في الاعتزال بعد مسلسل "طايع"
كشف المخرج عمرو سلامة أنه فكر كثيرا في الاعتزال خاصة وقت تصوير مسلسل "طايع" عام 2018 بسبب أحداث مر بها منها وفاة المخرج المنفذ روبير طلعت.
وقال عمرو سلامة خلال لقائه في برنامج "أسرار النجوم" من تقديم الإعلامية إنجي علي عبر إذاعة وقناة "نجوم FM": "أنا لحد دلوقتي مشفتش "طايع" من وقت ما خلصت تصويره لما بفتحه بفتكر حاجات حصلت، جالي صدمة نفسية كبيرة بعد وفاة المخرج المنفذ وصديقي روبير طلعت وقت التصوير، دا كان موقف خلاني أحس إني مش عايز اشتغل الشغلانة دي تاني، روبير طلعت توفى معايا وأنا بكلمه على التليفون".
وتابع عمرو سلامة ليحكي ما حدث: "كنا المفروض نسافر نصور برا وأنا مسافرتش، وهما راجعين كان لازم هو يستنى يوم زيادة، كلمني في يوم وكان صوته غريب وتعبان، فضلت معاه على التليفون لمدة ساعة لحد ما الممرضة أخدت التليفون وقالت لي إنه توفى وانا اضطريت أقول الخبر لأهله ولزوجته، ودا كان قبل رمضان بـ4 أيام ولازم أكمل تصوير المسلسل، دا كله بسبب الضغط العصبي بتاع الشغل".
