عصام شكري: كنت محظوظ بشغلي مع يحيى الفخراني ونور الشريف.. ومش لازم الممثل يكون دار تمثيل
كشف الفنان عصام شكري، تفاصيل بداياته الفنية، وتفاصيل عمله مع الفنان الراحل نور الشريف، والفنان يحيى الفخراني.
عصام شكري: كنت محظوظ بشغلي مع يحيى الفخراني ونور الشريف.. ومش لازم الممثل يكون دار تمثيل
وقال عصام شكري، في تصريحات تليفزيونية: أنا كنت من العاشقين لمعهد الفنوان المسرحية من قبل ما أدخله، وأنا كنت عايز أدرس تمثيل ودخولي المعهد فتح حاجات كتير جدًا، ومش شرط الفنان اللي دارس تمثيل يكون أحسن من اللي مش دارس، واهم ما في الموضوع الموهبة، لكن المعهد بيفتح آفاق كتير عند الممثل وبيحببه في القراءة وبيعلمه يبحث.
وتابع: أشتغلت مع الأستاذ نور الشريف مسرحية لعبة السلطان، ونور الشريف فنان من الطراز الأول واتعلمت منه كتير وفرق معايا، وفضلت علاقتي بيه لغاية ما اتخرجت وجه حضر مشروع التخرج بتاعي، هو كان فنان متميز ومش هيجي زييه.
وأضاف: أنا كنت محظوظ أني اشتغلت مع دكتور يحيى الفخراني في أوبرا عايدة والليل وآخره، الأول كان أوبرا عايدة الأستاذ أحمد صقر المخرج كلمني ورشحني للعمل وقالي أنت هتصور بعد بكره، وكنت مترشح لدور الفنان الجميل محمد سعد اللي اعتذر عن الدور، وكان من حظي أني أعمل الدور ده لأني كنت بعاني من نمطية الأدوار اللي حطني فيها بعض المخرجين، ودوري في أوبرا عايدة كان 36 مشهد، مش المساحات الكبيرة اللي كنت بعملها وقتها.
وأردف: مسلسل الليل وآخره، اللي رشحني للدور كانت الفنان رباب حسين، وعندها إحساس بالممثل أوي وبتعرف توجهه، وجت بالصدفة أني أشتغل للمرة التانية مع الدكتور يحيى الفخراني، وكلنا استمتعنا بالعمل.
