رحاب الجمل تكشف لـ" مصر تايمز" تفاصيل أزمة الفنان السكران: دخل بروفة الفيلم الجديد مش فى وعيه وخوفنا نشتبك معاه.. والموضوع ماينفعش فيه صلح لأنه أصبح خطر على حياتنا وواثقة إن النقابة هتجبلي حقى

قالت الفنانة رحاب الجمل فى تصريحات خاصة لـ" مصر تايمز" تعليقا على ما صدر من أحد الفنانين الذى رفضت ذكر اسمه قائلة" أنا واثقة فى النقابة انها هتجبلى حقى، الموضوع زاد عن حده أمس واللى حصل ماكنش ينفع يتسكت عليه إحنا كنا عايشين فى رعب إمبارح والوضع كان صعب"

وكشفت الجمل تفاصيل الأزمة وبدايتها قائلة" احنا داخلين فيلم معاه اسمه "ديك العياط" ، والمنتجة حجزت قاعة كبيرة علشان اجراءات التباعد نعمل فيها البروفة .. فا الفنان دخل البروفة فى حالة سكر .. وكلنا كنا ستات وشباب قاعدين خايفين من الحالة والمنظر اللى كان فيه الفنان ، وكنا خايفين نتكلم معاه لحسن الموضوع يتطور والموضوع يقلب خنافة ونشتبك معاه ".

وتابعت فى تصريحاتها لـ" مصر تايمز " قائلة " الموضوع أمس كان صعب جدا وأنا واثقة فى النقابة إنها هتجبلى حقى .. والموضوع ماينفعش فيه جلسة صلح لإنه بقا فيه خطورة علينا وعلى حياتنا .. إمبارح معرفناش يصعب علينا ولا نخاف منه من الوضع اللى كان فيه ".

واختتمت تصريحاتها قائلة " أنا مش هتنازل عن حقى وواثقة فى النقابة والدكتور أشرف زكى إنه هيجيب حقي وحق زمايلي".

وكانت كتبت رحاب الجمل، عبر حسابها على فيس بوك، قائلة: "الممثل السكران.. لما تبقي سكران وتدخل فرح وتضرب زميل نجم بالكوع ويسامحك لأنه مستغلبك ومستضعفك.. انت بقي تعتبر ان ده حق مكتسب.. وبعدها بحوالي شهرين تدخل حفلة وتشتم وتهين مغني شاب، ويكبر للناس اللي تدخلت في الموضوع ويسامحك بردو تعتبره حق مكتسب."

وأضافت: "لكن تدخل بالأمس بروفة فيلم وانت سكران وعايز كمان تلف حشيش ولما نعترض تشتم وتهين زمايلك وتغلط وتتلفظ بأقذر وأسفل الشتائم قدام الاغراب في مكان عام.. ديه ما تتسامحش عليها لازم تتعاقب وبالقانون لان ده قلة ادب وقلة مهنية والمرادي البلاغ للنائب العام علشان ارفع الحرج عن اي زميل او زميلة في طلب المشاركة في البلاغ أو الشهادة  يكفي تفريغ الكاميرات أنا هاربيك".