عزت زين لـ "مصر تايمز": مسرح الدولة بيقدم عروض مهمة ولكن خطواته بطيئة في الإنتاج
علق الفنان القدير عزت زين على تكريمه ليلة أمس في افتتاح الدورة الـ 17 للمهرجان القومي للمسرح والتي تحمل اسم الفنانة سميحة أيوب، كما كشف أيضا عن الأزمة التي يواجهها المسرح القومي خلال السنوات الأخيرة.
عزت زين يعلق على تكريمه بالمهرجان القومي للمسرح
قال عزت زين في تصريحات خاصة لـ "مصر تايمز": "طبعا أنا سعيد جدا بتكريمي في مهرجان القومي للمسرح لأن ده يعتبر أعلى تكريم لأي ممثل مسرح، يعني التكريم من المهرجان القومي للمسرح ده أعلى تكريم ممكن يحصل عليه أي مسرحي، وأنا سعيد جدا وشايف إن التكريم ده فيه إنصاف كبير".
وأوضح: "أنا شايف إن مسرح الدولة خطواته بطيئة في الإنتاج ولكنه بيقدم عروض مهمة جدا وعاملة نجاح جماهيري كبير".
كشف عن رأيه في اتجاه عدد كبير من النجوم لعروض مسرحية في الخارج وبالأخص المملكة العربية السعودية: "بعض النجوم بيقدموا مسرح في مصر وبعضهم لا، يعني أحمد حلمي مثلا قدم عرض في السعودية وبعدها قدم نفس العرض في القاهرة، ف مفيش حد بيسحب البساط من حد لأن هو بيقدم هناك لجمهوره في المملكة العربية السعودية زي ما بنقدم لجمهورنا المصري، ده ميتعارضش مع ده أبدا".
وأضاف: "أنا شايف إن مفيش أي تعارض وأكيد النجوم دول لو اتعرض عليهم شغل مسرح مش هيعترضوا يعني".
وصرح: "هو الموضوع كله فكرة البيروقراطية المصرية، البيروقراطية موجودة في المسرح زي ما موجود في قطاعات تانية كتير، هو الحل إن احنا بنبسط الإجراءات إلى حد كبير علشان نخلي الإنتاج ده يتقدم في زمن معقول، مش يتعمل بروفات في 7 شهور أو 8 شهور مثلا".
وأكد: "أنا عايز أقول إن المسرح الجامعي شغال كويس جدا وبيعمل مهرجانات كل سنة، وإن قصور الثقافة بتنتج سنويا فوق الـ 200 عرض، ولكن المشكلة إن النقد مش متابع اللي بيحصل ف دي مشكلة كبيرة، ولكن أنا عايز أقول إن كل الجهات دي بتنتج عروض مسرحية عدد ضخم جدا كل سنة".
