قبل فرحها بـ 10 أيام.. حادث مأساوي ينهي حياة عروس بالقليوبية بسبب “كشاف موتوسيكل”
جريمة بشعة شهدتها محافظ القليوبية راح ضحيتها فتاة كانت تستعد لحفل زفافها، وروت والدة شروق الضحية تفاصيل الواقعة، قائلة: ابني كان راكب الموتوسيكل بالليل والجو كان عتمة، وكان مشغل كشاف الموتوسيكل عشان يشوف قدامه في الطريق، ولكنه قابل واحد في الطريق ووقفه ورفع عليه السلاح وقاله إزاي تنور الكشاف في وشي، ولكن الأهالي اتجمعت ومشيته».
ضرب النار
وتابعت والدة شروق خلال لقائها مع الإعلامية نهال طايل ببرنامج «تفاصيل» المذاع على قناة صدى البلد 2، «تاني يوم تفاجئنا بإن فيه شباب كتير بيضربوا نار وجايين ينادوا على أحمد ابني وخدوه ضربوه بالمطاوي في جسمه كله، ولما حاولنا ننزل نشوف فيه إيه تحت؛ لقينا ضرب النار اشتغل وقالولنا اطلعوا فوق».
وأكملت والدة الضحية في حديثها: طلعنا فوق وإحنا مجبورين وتحت تهديد السلاح، ولما طلعنا فوق جرينا نبص على أحمد من الشباك ونصرخ بأن أحد يستنجدنا من الحملة الشرسة اللي جت علينا مرة واحدة».
واستكملت والدة شروق: «ملحقتش ابص من الشباك وابنتي سبقتني بالصراخ من النافذة، ولكنها تفاجئت برصاصة في رأسها ثم ركضت على الأرض، وانصدمت لما شوفتها سايحة في دمها، ولما نزلنا عشان نوديها المستشفى ونلحقها لقينا ضرب النار حوالينا ومشيوا ورانا كمان عشان منوصلش للمستشفى».
وتابعت: «خطيب ابنتي راح يسأل عليها تاني يوم في مستشفى ناصر، وموظفين الاستقبال قالوله إن مفيش واحدة هنا بالإسم ده، ومفيش غير واحدة جت الساعة 12 بالليل ومضروبة بالرصاص في رأسها ومتوفية، لكنها غير مسجلة بأي اسم، ولما اتأكد منها بلغنا ومن ساعتها وإحنا بنموت كل يوم حزن على شروق اللي فرحها كان الشهر ده».
