مها أحمد تهاجم منتقديها: "مش هسيب شغلي على التيك توك طول ما فيه فلوس"

أعربت الفنانة مها أحمد عن غضبها في بث مباشر على تيك توك، تجاه الانتقادات التي طالتها بسبب استفادتها المادية من المنصة، مؤكده أنها لن تتخلى عن أي موقع يجلب لها دخلاً.

وقالت مها: “أنا مستمتعة بعملي وبحب أقدم عروض على المسرح، مادام فيه فلوس، مش هسيب شغلي لا على التيك توك ولا على أي منصة تانية”.

وتابعت : “بالرغم من أنني فنانة ومن حقي العلاج على نفقة الدولة، لكن مش هعمل كده، الناس هتتنمر وتقول إني باخد حق الغلابة، أفضل أن يتكفل بعلاجي بنفسي وأبحث عن فرص للعمل والتعاون مع جهات قوية في الخارج، وعندي طموح للعمل خارج مصر، وبحب استكشاف الفرص العالمية، حتى لو كانت في مجالات مختلفة”.

وهاجمت الفنانة مها أحمد، متابعيها، عبر بث مباشر، على حسابها على «تيك توك» قالت فيه: «أنا جبلة مش بيحوق فيا أي تنمر، وباخد برشام التناحة، وبسف على السفافين وأحب أطلعهم على المسرح».

وقالت: شغلي على التيك توك وعلى أي برنامج مش هسيبه طول ما فيه فلوس مش هسيبه لأنك مش هتنفعني أنا عندي ليلة كبيرة".

وقالت مها: انا من الدرب الأحمر، من الحلمية والسيدة عائشة والسيدة زينب، وأهلي نصهم مقاولين وصنايعية ونصهم وزراء وضباط، يعني أنا مخلطة، أبويا مقاول وكان بيأكلني في القصعة، ف أنا متربية كويس أوي أعرف أمتي أرد أزاي أخد حقي".

وكانت مها أحمد قد انفعلت مؤخرا على متابعيها خلال لايف على موقع الفيديوهات تيك توك، بعد سؤالها عن موقف زوجها الفنان مجدي كامل من ظهورها في لايفات على الأبلكيشن 24 ساعة، قائلة: هو حاببني كده وبيموت فيا كده، ويا سلام بقى لو انا زعلت ورحت اشتكيت بيجبلي هدايا في ساعتها، ويروح يشتري ليا برفانات عشان عارف إني بحبها.

وأضافت مها أحمد: أنا مش بضايق من كل اللي يضايقني بكلامه في اللايف.. عارفين ليه علشان بستفيد من هجومكم وبيجيلي فلوس أكتر وداعمين، ومجدي بيقعد يقولى إلا زعلك يا مها مع إني مش بعيط عشان بيستخسر الدموع بصراحة، عايزاكم تفضلوا تضايقوني كل شوية وتسألوني عن مجدي كامل.

وخرجت مها أحمد في بث مباشر  عبر حسابها على تيك توك لتعلق على هذا الأمر قائلة: "إحنا بنطلع عشان مبنشتغلش، في الوسط مبنشتغلش ولقينا مجال زي السوشيال ميديا، ولو أنا مثلًا بعمل مسرح ولو فيه عائلة سعودية أو كويتية بيجيبولي هدايا، وعندي أصدقاء يمنيين بيجبولي فضة وبقبل الهدايا، فهل أقبل الهدايا وأنا في المسرح أو السينما ومش هقبلها على اللايف؟ لا هقبلها، أنا حرة ومحدش له حاجة عندي".

وكانت آخر أعمال مها أحمد مشاركتها في مسلسل بيت الشدة الذي عرض عام 2022، من إخراج وسام المدني، وتأليف ناجي عبد الله، وشارك فيه وفاء عامر وأحمد وفيق وإيهاب فهمي ومحسن منصور وغيرهم من الفنانين.