بسبب "حاجة 13 خالص" علي الطيب يعتذر لصناع مسلسل عمر أفندي " الفنان أناني ومش عيب"
أثار الفنان علي الطيب الجدل خلال الساعات الماضية بعد حذفه منشور والذي وجه في رسالة لـ صُناع مسلسل «عمر أفندي» بعد استخدامهم مصطلح «حاجة 13 خالص»، والذي استخدمه من قبل في مسلسل «أهو ده اللي صار» وجسد فيه شخصية «وديع البساطي».
ونشر "الطيب" عبر صفحته الرسمية بموقع «فيسبوك»، قائلا :«تم حذف البوست والأسباب هي، أنا ممكن أكون عبرت بشكل يزعل زمايلي من اللي اتكتب بس هما زعلوني بأنهم مذكروش في أي برنامج أو أي لقاء، أنهم اقتبسوا من وديع البساطي في مسلسل أهو ده اللي صار، مصطلح موجود في مصر زمان فعلا مش انا اللي اخترعتها»
وأضاف :«بس بيبقى كل ممثل يبذل مجهود من أجل الشخصية تبقى لحم ودم مش كلام على ورق فقط وبيقول كلام وخلاص، وده كان جزء من مجهودي اللي تم أثناء تحضير الشخصية في المسلسل وبعد ما عرضت بعض المصطلحات على الأستاذ السيناريست عبدالرحيم كمال والأستاذ حاتم على عليه رحمة الله، اختارنا اللي يتناسب مع الشخصية التي تعبر عن شخصيته واتوظف في الحوار بشكل مناسب ومنطقي للمشاهد من الأستاذ عبدالرحيم واتعرض المسلسل وربنا كتب لنا القبول في قلوبكم»
وتابع :«ونجح المسلسل واشتهرت شخصية وديع البساطي، بمصطلحاتها اللي تعتبر كانت جديدة على الجمهور رغم أن الجملة لها أصل ومعنى ووضحناه في المسلسل، وأظن احنا في مهنة واحدة يعني عارفين شغل بعض ونعرف بعض كويس وبينا كل خير لا يمكن يجيلي عمل فني أو اسكريبت واكتشف أن في جملة أو مصطلح مشهور لزميل ليه ونجح بيه واكرره أو اتجاهل مجهوده هو وصناع العمل واحترم نجاحه وحق كل فنان يغير ويبقى نفسه يعمل شخصية حلوة و يستمتع بأدائها المشاهد وده حق شرعي بس أظن أن التميز هنا هيكون في الاختلاف والاجتهاد المطلوب منك وليس الاستسهال».
واستكمل :«و لنفرض حصل وقلت مصطلح يخص شخصية فنيه لعبها زميل ومتفرجتش عليه أو مافيش حد نبهني، يبقى أقل واجب بعد عرض المسلسل وعرفت المعلومة يبقى أقل حق سواء كتاب العمل أو أنا كفنان أوضح في أي لقاء، في أي برنامج أنه تم الاقتباس من العمل الفني اللي قبلنا، ووقتها مش هيكون ليه حق ازعل وأفهمها تجاهل من زمايلي لأني غصب عني مفهمتهاش غير كده، واللي يعرفني كويس عارف إني دايما مبتأخرش عن زمايلي، وبفرح لنجاحهم من قلبي ولا عمري نفسنت ولا اتكلمت في تفاصيل شبه دي بس الموضوع لو مكنش يخصني كنت هقول كلمة حق في حق الزميل اللي سبق ونجح بشخصية وبمصطلحاتها اللي علمت مع الجمهور بفضل ربنا»
وأضاف "وأهم من كل ده اكتشفت أن بعض الصحفيين هيحولوا الموضوع لمشكلة وهيكبروا الموضوع بيني وبين حاتم وأبو سريع وآيه، واحنا اللي بينا كل خير وصحاب واخواتي وعلى راسي وربنا يعلم أنهم غاليين عندي بس حسيت اني مش شرط يكون زعلى من تجاهلهم يفرق معاهم"
واختتم :«فا محبتش اسيب الموضوع يكبر وتاخد اتجاه مش لطيف، وطلبت من الشباب المسؤولين عن الصفحة تحذف البوست لأن العتاب والهزار هيقلب جد لحد ما اكتب بوست أوضح فيه وربنا ما يجيب زعل ولا مشاكل، وعلى رأي البساطي، الفنان أناني ومش عيب».
وتصدرت جملة " دى حاجة 13 خالص" التى تستخدم فى مسلسل " عمر أفندى" بطولة النجمين أحمد حاتم وآية سماحة، مواقع التواصل الاجتماعي ، واستخدامها نادي ليفربول لاحتفاله بهدف محمد صلاح في شباك مانشستر يونايتد على طريقة مسلسل "عمر أفندي".
وكان الفنان علي الطيب وجه رسالة لصناع مسلسل عمر أفندي عبر حسابه على«فيس بوك»، وكتب: «حابب أبارك لكل زمايلي في عمر أفندي على نجاحهم بجملة وديع البساطي المشهورة دي حاجة ١٣ خالص».
وأضاف: «واستنوا على الجزء التانى لغاية ما أفكر لكم في الجديد منه عشان تعرفوا تقلدوه.. تحياتي للي نجحوا بـ مصطلحاتي وطول عمرها اللعبة ليها أصول وبنتعلم من بعض مش بنعلم على بعض».
مسلسل عمر أفندي مكون من 15 حلقة، وهو بطولة أحمد حاتم، آية سماحة، رانيا يوسف، محمد رضوان، محمود حافظ، ومن تأليف مصطفى حمدي، وإخراج عبدالرحمن أبوغزالة.
